ଗୁରୁ ପୂଜନ
ଗୁରୁ ପୂଜନ
ଗୁରୁ ତୁମେ ମାତା ଗୁରୁ ତୁମେ ପିତା
ଗୁରୁ ତୁମେ ବିଦ୍ୟାଦାତା
ଗୁରୁ ତୁମେ ବ୍ରହ୍ମା ବିଷ୍ଣୁ ମହେଶ୍ୱର
ତୁମେ ତାରଣ କରତା
ହାତ ଧରି ନିଅ ଅଜ୍ଞାନ ଅନ୍ଧାରୁ
ତୁମେ ଜ୍ଞାନର ବଳୟ
ଅଜ୍ଞାନ ଦେଶର ଉତ୍ତପ୍ତ ସହରେ
ତୁମେ ଶୀତଳ ମଳୟ
ଜ୍ଞାନ ନିର୍ଝରିଣୀ କରୁଣା ସାଗର
ନର ରୂପୀ ନାରାୟଣ
ତଵ ପାଦପଦ୍ମ ଧ୍ୟାଇଲେ ଭକ୍ତିରେ
ମୂଢ଼ ହୁଏ ବିଜ୍ଞ ଜନ
ଶିଳା ହୁଏ ମୂର୍ତ୍ତି ତୁମେ ଦେଲେ ଛୁଇଁ
ଏମିତି କୁଶଳୀ ତୁମେ
ତୁମ ସ୍ପର୍ଶ ବିନା ଜୀଵନ ଅନ୍ଧାର
ନକ୍ଷତ୍ରର ଜ୍ୟୋତି ତୁମେ
ସତ୍ୟ ତ୍ୟାଗ ନିଷ୍ଠା ଲାଳିତ୍ୟ ପାଣ୍ଡିତ୍ୟ
ସାଧୁତା ଓ ମହାନତା
ତୁମ ଚରିତ୍ରର ସ୍ୱତନ୍ତ୍ର ବୈଶିଷ୍ଟ୍ୟ
ହୃଦେ ନାହିଁ କପଟତା
ଦେଶର ଗୌରବ ଜାତିର ପ୍ରଗତି
ମେରୁଦଣ୍ଡ ସମାଜର
ଶିଷ୍ୟଙ୍କ ଭବିଷ୍ୟ ତୁମରି ହାତରେ
ତୁମେ ହିଁ ମଣି ମଥାର
ଆଶିଷ ମୁକୁତା ଝରୁ ଥାଉ ସଦା
ମସ୍ତକରେ ଥାଉ ହାତ
ହେ ଚିର ନମସ୍ୟ ପୂଜ୍ୟ ଗୁରୁଦେବ
ଘେନ ଆମ ପ୍ରଣିପାତ