ଗ୍ରୀଷ୍ମ ଭାବନା

ଆସିଲା ବଇଶାଖ ଜ୍ୟେଷ୍ଠ l

       ପ୍ରଚଣ୍ଡ ନିଦାଘର କଷ୍ଟ ll

ଶୁଖିଲା ପଙ୍କ ସରସୀର l

       ଦୁର୍ଗତି ଜଳଚରଙ୍କର ll

ଶୁଷ୍କ ପାଦପ ଶୁଷ୍କ ମହୀ l

   ପାଦ ଭୂମିରେ ନୁହେଁ ଥୋଇ ll

ପ୍ରଖର ବହେ ଶୁଷ୍କ ଝାଞ୍ଜି l

     ଭରସା ପଖାଳ ଓ କାଞ୍ଜି ll

ଝିଙ୍କାରି ଝିଇଁ ଝିଇଁ ନାଦେ l

    ମହୀ କମ୍ପଇ ବୀର ବାଦ୍ୟେ ll

ନିରବି ଗଲେଣି କୋକିଳ l

     ଚାତକେ ମାଗିଲେଣି ଜଳ ll

ହନୁ ଲାଙ୍ଗୁଳେ ବୈଶ୍ୱାନର l

     ଭବିଷ୍ୟ କଲେ ପାଞ୍ଜିକାର ll

ଡହକ ଚକଡା଼ ଲଗାଣ l

       ଆବର ସର୍ବତ୍ର ଲଗାଣ ll

ପ୍ରବଳ ହେବ ଝଞ୍ଜାବାତ l

      ଗୁଳୁ ଗୁଳି ଓ ଅଗ୍ନ୍ୟୁତ୍ପାତ ll

Advertisement

ମାନବେ ହୁଅ ସାବଧାନ l

     ଗ୍ରୀଷମେ କର ଜଳ ଦାନ ll

ଗ୍ରୀଷ୍ମ ବିନୋଦେ ବନମାଳୀ l

     ବାହାରିଲେଣି ଚାପ ଖେଳି ll

ଖଣ୍ଡ ଚନ୍ଦନ ମଣ୍ଡି ଅଙ୍ଗେ l

     ଶରୀର ଶୀତଳନ୍ତି ରଙ୍ଗେ ll

ଭୂମିରୁ ଶୋଷି ଜଳ ମଳ l

     ସୂର୍ଯ୍ୟ ଶୃଜିଲେ ମେଘମାଳ ll

ଜ୍ୟେଷ୍ଠର ଶେଷରେ ଆଷାଢ଼ l

     ଆକାଶେ ମେଘ ଘଡ଼ ଘଡ଼ ll

ବଜ୍ର ନାଦରେ କମ୍ପେ ମହୀ l

       ମେଘେ ବିଜୁଳି ଚମକଇ ll

ଶୀତଳ ସନ୍ତାପିତ ମହୀ l

      ଗ୍ରୀଷମ ପଳାଇଲା ଧାଇଁ ll

ରଥରେ ଚକ୍ରୀ ଚକ୍ରଧର l

      ଚକ୍ରରେ ଘୁରାନ୍ତି ସଂସାର ll

ନମସ୍ତେ ବିଶ୍ୱ କାରିଗର l

       ଅଗତି ଗତି ପ୍ରାଣୀଙ୍କର ll