ଗହ୍ମା ଚକୁଳି

ଶୁଣ ସାହୁ ଝିଅ ମଝିଆଁ ବୋହୁ

   ରାତିରେ କରିବୁ ମାଣ୍ଡିଆ ଯାଉ l

ଯାଉ ସଙ୍ଗେ ପୁଣି ବୁଢ଼ା ଚକୁଳି

   ଫୁଲ ଚନ୍ଦନରେ ସଜାଇ ଥାଳି l

ଆଜି ଆମ ଇଷ୍ଟ ଦେବ ହଳିଆ

  ଜନମ ଲଭିଲେ ଡାକିଲେ କୁଆଁ l

କୃଷକର ବନ୍ଧୁ କୃଷି ଦେବତା

    ଦ୍ୱାପର ଯୁଗର ବିଚିତ୍ର କଥା l

ଦେବକୀ ଗର୍ଭରୁ ହୋଇ ହରଣ

  ରୋହିଣୀ ଉଦରୁ ଲଭିଲେ ଜନ୍ମ l

ହଳାୟୁଧ ହଳୀ ସଙ୍କରଷଣ

   ଶେଷ ଦେବ ଧରାଭାର ହରଣ l

ତାଳ ବଣ ମଧ୍ୟେ ବଧି ଧେନୁକା

  ଗୋପ ବାଳକଙ୍କୁ ରଖିଲେ ଏକା l

ତୁଳସୀ କ୍ଷେତ୍ରରେ କ୍ଷେତ୍ରାଧିପତି

    ତାଙ୍କର କାହାଣୀ ବିଚିତ୍ର ଅତି l

ଶ୍ରୀକ୍ଷେତ୍ରରେ ବିଜେ ଜଗା ବଳିଆ

    ସୁଭଦ୍ରା ଭଉଣୀ ଚାନ୍ଦ ଭଳିଆ l

ଆଜ କରି ଆମ ଇଷ୍ଟ ପୂଜନ

   ଧନ୍ୟ ହେବ ଆମ ମଣିଷ ଜନ୍ମ l

ଗାଈ ବଳଦଙ୍କୁ ଦୀପେ ବନ୍ଦାଇ

    ଯାଉ ଚକୁଳିକୁ ଦେବ ଖୁଆଇ l

ଆମ ଧନ ସିନା ପଶୁ ସମ୍ପଦ

    ବିଲ ଚାଷକରୁ ଯୋଡ଼ି ବଳଦ l

ଶୁଣ ଶୁଣ ହୁଣ୍ଡି ତୁ ସାନ ବୋହୁ

   ହାତ ଟିକେ କର ତୁ ଟାଉଟାଉ l

ବଡ଼ ବୋହୁ ସଙ୍ଗେ ସଜାଇ ଥାଳି

   ଯାଅ ତିନିବୋହୁ ଗୁହାଳେ ଚାଲି l

ହୁଳ ହୁଳି ଦେବ ବନ୍ଦାଇ ଗାଈ

    ସୁମରି ଭକ୍ତିରେ କଳା କହ୍ନାଇ l

ଜୟ ହଳଧର ରେବତୀ କାନ୍ତ

   କୃଷକ ଘରଣୀ ଯୋଡ଼ିଲେ ହସ୍ତ ।