Library
Profile
ଏବେଠୁ କରିବି ପଣ
ଏବେଠୁ କରିବି ପଣ
ସ୍ବାଧୀନ ଭାରତେ ଜନ୍ମିଛି ମରତେ
ସ୍ବାଧୀନେ ପ୍ରକାଶି ଗୁଣ
ଦେଶ ମାଆ କୋଳେ ଭରିବାକୁ ଯଶ
ଏବେଠୁ କରିବି ପଣ ।
ଆଜି ଅଛି ଶିଶୁ କାଲି ହେବି ବଡ଼
ପିତାମାତା ଆଶିଷରେ
ଲକ୍ଷ୍ୟଚ୍ୟୁତ କେବେ ନହୋଇ ଜୀବନେ
ଧାଉଁଥିବି ହରଷରେ ।
ଜନକଜନନୀ ଗୁରୁ ଗୁରୁଜନ
ପାଦେ ରଖି ସଦା ମତି
ବଢ଼ି ଚାଲିଥିବି ଆଗକୁ ଆଗକୁ
ବଢ଼ାଇ ମୋହର ଗତି ।
ଦେଉଥିବେ ଜାଳି ଜ୍ଞାନର ଦୀପାଳି
ନୀତି ଆଦର୍ଶ ସଂସ୍କାର
ଦୀପକଟେ ପରି ଜଳୁଥିବି ମୁହିଁ
ନରଖି ମନେ ବିକାର ।
ସତ୍ୟ ଧର୍ମ ନ୍ୟାୟ ପଥେ ଥିବ ଲୟ
ବିଚାରଧାରା ଉନ୍ନତ
ସୂ
ରଯ ସମ ମୁଁ ସମାନତା ନେତ୍ରେ
ଦରଶାଇବି ଏକତ୍ବ ।
କୃଷି, ଶିକ୍ଷାଠାରୁ ଦେଶର ସୁରକ୍ଷା
ସବୁଥିରେ ଥିବ ହାତ
ଉନ୍ନତ କରି ଗଢ଼ିବି ମୋ ଦେଶ
ବିଶ୍ବେ ବଢ଼ିବ ମହତ ।
ସର୍ବେ ଭାରତୀୟ ଆମେ ଏକ ଜାତି
ନଥିବ ବାଛବିଚାର
ପାଉଥିବେ ସର୍ବେ ନିଜ ଜ୍ଞାନ ବଳେ
ଯୋଗ୍ୟତାରେ ଅଧିକାର ।
ପ୍ରତ୍ୟେକ କ୍ଷେତ୍ରରେ ସ୍ବଚ୍ଛତା ଭିତ୍ତିରେ
ଦେଖାଇ ପାରଦର୍ଶିତା
ସୁଖ ଶାନ୍ତି ଗୀତି ଗାଉଥିବେ ନୀତି
ଦେଶେ ସକଳ ଜନତା ।
ସେବା ଧର୍ମ ମାନି ଜୀବନର ବ୍ରତ
ଦୁଃଖୀ ଲୁହ ପୋଛୁଥିବି
ସକଳ ମୁଖରେ ହସ ଟିକେ ଭରି
ଜନ୍ମ ସାର୍ଥକ ମଣିବି ।
