ଏ ଜୀବନ, ଏକ ବରଦାନ
ଏ ଜୀବନ, ଏକ ବରଦାନ
ଏ ଜୀବନ ଏକ କାହାଣୀଟିଏ
କେବେ ପୁଣି ଏକ କବିତା
କେବେ ଏ ଜୀବନ ମାଣିକଠୁ ବଳି
ସରି ହୁଏ ନାହିଁ ମୁକୁତା ll
ଏ ଜୀବନ କେବେ ଟୋପାଏ ସିନ୍ଦୁର
କେବେ ପୁଣି ନାଲି ଅଳତା
କେବେ ନାରୀ କେବେ ପୁରୁଷ ରୂପରେ
ଅନନ୍ୟ ତା' କଥା ସରିତା ll
ଏ ଜୀବନ ଅଟେ ଦୁର୍ଲଭ ଦୁର୍ମୁଲ୍ୟ
ହୀରା ନୀଳାଠାରୁ ବଳି
ଈଶ୍ୱରଙ୍କ ଦାନ ଅଟେ ଏ ଜୀବନ
ଅଟଇ ଅମୃତ ଭଳି ll
ବରଦାନ ସମ ଅଟେ ଏ ଜୀବନ
ତନ୍ମଧ୍ୟେ ମାନବ ଜନ୍ମ
କେତେ ପୁଣ୍ୟ ବଳେ ଏଇ ମହୀତଳେ
ଲଭିଥାଏ ଅନୁପମ ll
ଦୁର୍ଲଭମୟ ଏ ଶାଶ୍ୱତ ଜୀବନ
ଅନ୍ୟଥା ନହେଉ ନଷ୍ଟ
ସବୁ ପରିସ୍ଥିତି ପ୍ରତିକୂଳ ଡେଇଁ
ହୋଇଉଠୁ ସଦା ପୁଷ୍ଟ ll
ହସ ଲୁହ ଭରା ଏ ଜୀବନ ଡ଼ଙ୍ଗା
ଜନ୍ମ ମୃତ୍ୟୁ ଦୁଇ କୂଳ
ତାହାରି ଭିତରେ ସୁଖ ଦୁଃଖ ସାଥେ
ରତ ହୁଏ ଏଠି ବେଳ ll
ସାର୍ଥକ ହେଉ ଏ ନଶ୍ୱର ଜୀବନ
ସୁକର୍ମ, ସାମର୍ଥ୍ୟ ବଳେ
ଅମରତ୍ୱ ଲଭୁ ଲଭି ବିଭୁ କୃପା
ଧନ୍ୟ ହେଉ ମହୀ ତଳେ ll