ଦୂରଦର୍ଶନ ନିଶା

ଦୂରଦର୍ଶନଟି କିଣିଦେଲେ ବାପା କୁନା ମନ ଛନଛନ

ଦିନରାତି ଖାଲି ଟିଭି ପାଶେ ବସି ପାଠରେ ନଦେଲା ମନ |

କେତେବେଳେ କେଉଁ ସିରିଏଲ ହେବ ତାହାକୁ ଭଲରେ ଜଣା

ସ୍କୁଲରୁ କେଉଁବାଟେ ଖସିଆସେ ଗୁରୁଜୀ ଥାନ୍ତି ଅଜଣା |

ଆଇପିଏଲ କ୍ରିକେଟ ଖେଳ ହେଲେ ସାରା ରାତି ଉଜାଗର

ମହାଭାରତ କି ରାମାୟଣ ଦେଲେ ଦର୍କାର ନାହିଁ ଖାଦ୍ୟର |

ପିତା ମାତାଙ୍କର ଗେହ୍ଲା ପୁଅ ସିଏ ସବୁ ଆଦରର ଖଣି

ଆକଟ ଅଭାବ ଅତି ସ୍ନେହଭାବ ଅବାଟରେ ଧନମଣି |

ଯାତ୍ରା ନାଟ ଗୀତ ଅଶ୍ଳୀଳ ଚିତ୍ରକୁ ଧିରେ ଧିରେ ଆଦରିଲା

ବାପ ମାଆଙ୍କର ଅଜ୍ଞାତରେ ନଗ୍ନ ରମଣ ଦୃଶ୍ୟ ଦେଖିଲା |

ପରୀକ୍ଷା ଆସିଲା ଚିନ୍ତାଜ୍ଵର ହେଲା କିଛି ହେଲେ ପଢ଼ିନାହିଁ

ସାଙ୍ଗ ସାଥିମାନେ ଯାହା ପଚାରିଲେ ମୂକ ପରି ରହେ ଚାହିଁ |

ପରୀକ୍ଷା ଦିନରେ ମହାଭାରତର କର୍ଣ୍ଣବଧ ପର୍ବ ଥିଲା

ବସୁବସୁ ତାର ମନେ ପଡ଼ିଗଲା ଅଧାରୁ ଉଠିଆସିଲା |

ଗୁରୁଜୀ କହିଲେ କିଛି ଲେଖିନାହୁଁ ଖାତା ଦେଲୁଣି ଫେରାଇ

ଅତରଛ ଝାଡା ଲାଗିଲାଣି ଆଜ୍ଞା ପେଟ ମାରେ ଟାଇଁ ଟାଇଁ |

ପାଇଖାନା ଯାଅ କହନ୍ତେ କହିଲା ଘରକୁ ମୁଁ ଚାଲିଯିବି

ଡାକ୍ତର ସହିତ ପରାମର୍ଶ ହୋଇ ଶୀଘ୍ର ଔଷଧ ଖାଇବି |

ସମ୍ଭାଳି ହେଉନି ଅହୋ କି ଯନ୍ତ୍ରଣା ମିଛକହି ଚାଲିଗଲା

ମହାଭାରତର ଅଧା ସିରିଏଲ ଦେଖି ମନ ଖୁସି କଲା |

ପରୀକ୍ଷାରେ ଫେଲ ହେଲା ପରେ ବାପା କରିଲେ ଦୃଢ଼ ଆକଟ

ଦିନେ ହେଲେ ଆଉ ଟିଭି ଦେଖିବୁନି ଶୁଣି ହେଲା ଛଟପଟ |

ପାଠ ପଢ଼ା ଆଗ ଟିଭି ଦେଖା ପଛ ମନେ ରଖ ବାଳଗଣ

ଦୂରଦର୍ଶନରେ ବାଇଆ ହୋଇଲେ ପାଠ ନଷ୍ଟ ଅକାରଣ |