ଚିତ୍ରଲେଖା

ନଦୀର ନାମ ସୁବର୍ଣ୍ଣରେଖା

   ଘାଟର ନାମ ମିତ୍ରମୂଖା

ତୀରର ନାମ ଆଦ୍ୟରେଖା

   ପ୍ରିୟାର ନାମ ଚିତ୍ରଲେଖା ।

ମୁହାଣ ନାମ ଆଦ୍ୟଶିଖା

   ଗଣ୍ଡର ନାମ ନାଭିଶୁଖା

ତରୁରେ ଫଳ ରକ୍ତମୁଖା

   ଫୁଲରେ ହସେ ଚାରୁରେଖା ।

ଦିନର ନାମ ମଙ୍ଗଳମଧୁ

   ଲଗ୍ନର ନାମ କଳ୍ପକାୟା

ସମୟ ଖେଳେ ପବନ ମେଳେ

   ପ୍ରୀୟା ପଣତ ମଗ୍ନ ଛାୟା ।

ନଦୀ ଦର୍ପଣେ ମୁଖ ତର୍ପଣେ

  ହିଲ୍ଲୋକ ଧାରେ ରୂପାଜହ୍ନ

ମୁରୁକି ହସି ସେ ମଲ୍ଲୀକଷି

  ଗଣ୍ଡୁଷ ଭରେ ବସି ସାୟାହ୍ନ ।

ତରଙ୍ଗ ଧାରେ ମରୁତ ମାରେ

  ଚୂର୍ଣ୍ଣ କୁନ୍ତଳ ଇତଃସ୍ତତଃ

ମୂଖ ମୟୂଖ ଘୋଡାଏ ଦେଖ

  ଚିତ୍ର ଚରିତ୍ର ଅସ୍ତବ୍ୟସ୍ତ ।

ନାବିକ ପୁଅ ଆହୁଲା ଥୁଅ

  ନୟନ ସୁଖ ଲାସ୍ୟାଛାୟା

ନୀଳ ଅମ୍ବରୀ ନୀଳ ଲହରୀ

  ଚପଳ ଛନ୍ଦେ କାବ୍ୟମାୟା ।