ଚିତ୍ର ଚରିତ - 71 : କବିତା : ତିନି-ତିନି-ତିନି
ଚିତ୍ର ଚରିତ - 71 : କବିତା : ତିନି-ତିନି-ତିନି
ତିନୋଟି କଥାକୁ ମନେ ରଖିଥିଲେ ମଣିଷ ହୋଇବି ମୁହିଁ,
ସତ୍ୟ-ଧର୍ମଦୟା ହୃଦୟରେ ଥିଲେ ଶାନ୍ତିରେ ପାରିବି ଜିଇଁ |
ସମୟ -ସୁବିଧା-ପରୀକ୍ଷା ତିନୋଟି ଆସିଥାଏ ମାତ୍ର ଥରେ,
ହାତଛଡ଼ା କଲେ ଫେରି ଯିବେ ସିଏ ମିଳିବେନି ସହଜରେ |
ସ୍ଵପ୍ନ-ଭବିଷ୍ୟତ ଆଉ ସଫଳତା ଆମରି ହାତରେ ଅଛି,
ତାକୁ ଯିଏ ଥରେ ଅବହେଳା କରେ ତାକୁ ମିଳେନାହିଁ କିଛି |
ଆତ୍ମ-ବିଶ୍ୱାସ-ବନ୍ଧୁତା-ପ୍ରେମକୁ ଦୃଢ଼କରି ରଖିଥିବି,
ତାଙ୍କରି ବଳରେ ଜଗତକୁ ଜିଣି ବିଜୟୀ ଘୋଷିତ ହେବି |
ମିଥ୍ୟା-ଈର୍ଷା ଆଉ ଅହଂକାର ମିଶି ମଣିଷକୁ ନାଶକରେ,
ଏ'ତିନିକୁ ତ୍ୟାଗ କରିଲେ ସିନା ମୁଁ ଉପରକୁ ଉଠିପାରେ |
ଆଶା-ନ୍ୟାୟ ଆଉ ଶାନ୍ତିର ପକ୍ଷରେ ରହିଥିବି ସବୁବେଳେ,
କ୍ଷମା-ଉପକାର-ସେବାଭାବ ଥିଲେ ସମ୍ମାନ ମିଳିବ ବଳେ |
ସଂଯମତା ଆଉ ସହନଶୀଳତା ତା' ସହିତ ଵାମଭାବ,
ଏ' ତିନି ରହିଲେ କ୍ରୋଧ ଚାଲିଯିବ ଶ୍ରାଦ୍ଧାଭାବ ଉପୁଜିବ |
ମଣିଷକୁ ଟାଣେ ତଳକୁ ତଳକୁ ମୋହ-ମାୟା ଆଉ ଭୟ,
ସାହସ-ବିଶ୍ଵାସ-ନିଷ୍ଠା ତିନି ମିଶି ଆଣନ୍ତି କେବଳ ଜୟ |