ଚିତୋଉ ପିଠା

ବଡ଼ ଦେଉଳରେ ବିଶ୍ୱ କରତା

   ଲାଗିହେଲେ ପ୍ରଭୁ ରତନ ଚିତା l

କୌସ୍ତୁଭ ଭୂଷଣ ହୁଅନ୍ତି ସଜ

   ରୂପରେ ପ୍ରକାଶେ ମହାଐଶ୍ୱର୍ଯ୍ୟ l

ହଳିଆର ଘରେ ପୂଜା ପାର୍ବଣ

    ନମଃ ହଳାୟୁଧ ସଂକରଷଣ l

ପରବେ ବ୍ୟବସ୍ଥା ପିଠା ଗଇଁଠା

   ଅତି ସୁଆଦିଆ ଚିତୋଉ ପିଠା l

ମିଠା ପଣେ ନିନ୍ଦେ ଅମୃତ ସେହି

  ବନ୍ଦେ ଗାଇ ଗୋରୁ କୃଷକ ଭାଇ l

ବିରି ଚାଉଳକୁ ଶିଳେ ବଟାଇ

    ନଡ଼ିଆକୋରାକୁ ଗୁଡ଼େ ମିଶାଇ l

ଅମେଇସାପାଇଁ ପିଠା ଚିତୋଉ

     ପିଠା ଗଢୁଅଛି କୃଷକ ବୋହୁ l

ନାନା ଜାତି ପିଠା ପଣା ଉତ୍ସବ

     ପିଠା ଖିଆ ଓଡ଼ିଆର ବାନ୍ଧବ l

ତେର ପୂଜା ତାର ବାର ମାସରେ

   କେଉଁଠି କି କାହିଁ ଅଛି ବିଶ୍ୱରେ l

ସଞ୍ଜ ଦୀପ ଜାଳି କୃଷକ ବୋହୁ

      ହୁଳହୁଳି ଶୁଭଇ ମୁହୁର୍ମୁହୁଃ l

କୃଷକ ଘରଣୀ କୃଷକ ଭାଇ

    ପିଠା ପୂଜାକଲେ ପାଣି ଛଡ଼ାଇ l

ଗେଣ୍ଡେଶୁଣି,ଗେଣ୍ଡା,କୋଚିଆ ଭାଇ

    ବାପ ଭାଇ ଗୋଡ଼ କାଟିବ ନାହିଁ l

ହେ ବିଶ୍ୱ ବିଧାତା ଜଗତ୍ଜୀବନ

     ଜୀବ ଯାଉ ଗାଇ ତଵ ଭଜନ l

କୃଷକ ଭରସା ଦେବ ଦଇବ

     ନମଃ ନମଃ ପ୍ରଭୁ ବିଶ୍ୱ ବାନ୍ଧବ l