ବରଷା ରାଣୀ ଝରାଏ ପାଣି

ବରଷା ରାଣୀ ଝରାଏ ପାଣି

ଅମୃତ ଝର ପରା 

ଆକାଶେ ଥିଲା ମେଘ ରୂପରେ

ଶୋଷିଥିଲା ଯା ଖରା ।

ବରଷ ସାରା ସୁରୁଜ ଶୋଷେ

ଖରା ରୂପରେ ପାଣି 

ମେଘ ବରଷା ହୁଅଇ ଯେବେ

ମେଘରୁ ଖସେ ପାଣି ।

କଳାମେଘର ଶାଢୀଟି ପିନ୍ଧି

ଆସେ ବରଷା ରାଣୀ

କଳାମେଘକୁ ଦେଖି ମୟୂର

ନାଚଇ ରଚି ଠାଣି  ।

ବରଷା ରାଣୀ ଝରାଏ ପାଣି

ପୂରଇ ନଇ ନାଳ 

ବହୁଳ ଯେବେ ବରଷା ହୁଏ

ବନ୍ୟା ହୁଅଇ କାଳ ।

ବରଷା ରାଣୀ ଆମ ମିତଣୀ

ଝରାଇ ଦେଇ ପାଣି 

ଶସ୍ଯ ଶ୍ୟାମଳା ଧରାକୁ କରେ

ହସେ ଧରଣୀ ରାଣୀ ।

ଭଳିକି ଭଳି କେତେ କୁସୁମ

ଗଛଲତାରେ ଫୁଟେ 

କି ମନୋହର ଦିଶଇ ଦେଖ

ସୁବାସ ତାର ଛୁଟେ ।

ବରଷା ରାଣୀ ଆସିବା କ୍ଷଣି

ବେଙ୍ଗରଜାଟି ରଡେ 

ନୀରବ ପିକ ହେଲାଣି ଏବେ

ବରଷା ଝରି ପଡେ ।

ବରଷା ରାଣୀ ଝରାଏ ପାଣି

ଭାସିଲା ପାଣି ଯେବେ 

ପିଲାଏ ଆସି କାଗଜ ଡଙ୍ଗା

ଭସାଇଲେଣି ତେବେ ।

ରାତି ବରଷା ମାଆ ପରଶା

ଲାଗଇ ଭାରି ଭଲ 

ବରଷା ରାଣୀ ଆସିଲା ବୋଲି

ପଦୁଅଁ କଲବଲ  ।

ଜୀବନ ତାର ଯାଉଛି ଚାଲି

ବରଷା ରାଣୀ ପାଇଁ 

ଜୀବନ ଆମେ ପାଉଛେ ଏଇ

ବରଷା ରାଣୀ ପାଇଁ ।