ବ୍ରହ୍ମଚାରିଣୀ
ବ୍ରହ୍ମଚାରିଣୀ
ନବଦୁର୍ଗାଙ୍କର ଦ୍ୱିତୀୟ ସ୍ବରୂପ
ଅଟଇ ବ୍ରହ୍ମଚାରିଣୀ
ଭବ୍ୟ ରୂପ ଦକ୍ଷ କରେ ଜପମାଳା
ବାମେ କମଣ୍ଡଳୁ ପୁଣି ।
ଜ୍ୟୋତିର୍ମୟୀ ମାତା ପ୍ରଖର ଜ୍ୟୋତିରେ
ହେଉଥାନ୍ତି ଉଦ୍ଭାସିତ
ଶିବଙ୍କୁ ଲଭିବେ ପତି ରୂପେ ଦେବୀ
ରହିଲେ ତପସ୍ୟାରତ ।
କଠୋର ତପସ୍ୟା କରିଥିଲେ ଦେବୀ
ବ୍ରହ୍ମଚାରିଣୀ ବୋଲାଇ
ହଜାର ବରଷ କାଳ ସେ ରହିଲେ
ବନ୍ୟ ଫଳ ମୂଳ ଖାଇ ।
ଶତ ବରଷ ସେ ଶାଗ ପତ୍ର ଖାଇ
ଜୀବନ ନିର୍ବାହ କଲେ
କିଛି କାଳ ଘୋର ଉପବାସ କରି
ଖରା ବରଷା ସହିଲେ ।
ତିନି ହଜାର ବରଷ ସେ ଖାଇଲେ
ଗଛଝଡା ବେଲପତ୍ର
ଶୁଖିଲା ପାଚିଲା ବେଲପତ୍ର ଖାଇ
ଶିବ ଆରାଧନା ରତ ।
କେତେ ହଜାର ବରଷ ସେ ନ ଖାଇ
ନିର୍ଜଳ ତପସ୍ୟା କଲେ
ପର୍ଣ୍ଣ ପରିହାର କରିବାରୁ ଦେବୀ
ଅପର୍ଣ୍ଣା ନାମ ବହିଲେ ।
ଅତି କୃଶକାୟ ଶରୀର ହୋଇଲା
ମାତା ଡାକିଦେଲେ ଉ ମା
ସେହିଦିନଠାରୁ ଆଉ ଏକ ନାମ
ଦେବୀଙ୍କର ହେଲା ଉମା ।
ତପ ସିଦ୍ଧ ହେଲା ଦେବ ଋଷି ସିଦ୍ଧ
ମୁନିଏ ପ୍ରଶଂସା କଲେ
ଶିବଙ୍କୁ ଲଭିବେ ପତି ରୂପେ ବୋଲି
ବ୍ରହ୍ମା ଆକାଶୁଁ କହିଲେ ।
ଦୁର୍ଗା ପୂଜନର ଦ୍ୱିତୀୟ ଦିନରେ
ଦେବୀ ମା ବ୍ରହ୍ମଚାରିଣୀ
ତପ ତ୍ୟାଗ ବୈରାଗ୍ୟ ସଂଯମ
ସଦାଚାରର ବରଦାୟିନୀ ।
ଅନନ୍ତ ଫଳ ଦାତ୍ରୀ ହୁଅନ୍ତି ମାତା
ସିଦ୍ଧ ଓ ଭକତଙ୍କର
ସ୍ବାଧିଷ୍ଠାନ ଚକ୍ରେ ସ୍ଥିତ ହୁଏ ମତି
ଏଦିନ ସାଧକଙ୍କର ।