ବନ୍ଦେ ଉତ୍କଳ ଜନନୀ
ବନ୍ଦେ ଉତ୍କଳ ଜନନୀ
ଉତ୍କର୍ଷ କଳାର ଦେଶ ମୋ ଜନନୀ
ମାତୃଭୂମି ଏ ଉତ୍କଳ l
ଭାରତ ସରସେ କମଳ ଯେସନ
କେଶର ତା ନୀଳାଚଳ l
ଶ୍ରୀ ମନ୍ଦିରେ ଉଡ଼େ ଓଡ଼ିଆ ଜାତିର
ଗର୍ବ ବିଜୟ କେତନ l
ବିଜେ କରିଛନ୍ତି ବ୍ରହ୍ମାଣ୍ଡ ଠାକୁର
ପ୍ରଭୁ ନୀଳାଦ୍ରି ମଣ୍ଡନ l
ଉତ୍କଳ ଉତ୍କର୍ଷେ ଏ ଧରା ଧାମରେ
କେହିକି ହେବେ ସମର୍ଥ l
ଉତ୍କଳର ନେତା ସ୍ୱୟଂ ନାରାୟଣ
ମହାପ୍ରଭୁ ଜଗନ୍ନାଥ l
ଉତ୍କଳର ମାନ ରଖିଥିଲେ ଦିନେ
କଳା ଧଳା ଦୁଇ ଭାଈ l
କରବାଳ ହସ୍ତେ ଉଭା ହୋଇଥିଲେ
ସମର ଭୂମିରେ ଯାଇ l
ଏକଥା ପ୍ରମାଣେ ଚିଲିକା ତୀରରେ
ମାଣିକ ପାଟଣା ରହି l
ତୃଷ୍ଣା ମେଣ୍ଟାଇଲେ ମହାପ୍ରଭୁ
ଖାଇ ମାଣିକା ହସ୍ତରୁ ଦହି l
ଲିଙ୍ଗରାଜ, ଶ୍ରୀମନ୍ଦିର,କୋଣାରକ
ଅପୂର୍ଵ କିରତୀ କଳା l
ଆଶ୍ଚର୍ଯ୍ୟ ଲାଗଇ କିଏ ସେ ଶିଳ୍ପୀ
ଆଙ୍କି ଦେଇ ଚାଲିଗଲା l
ଏ ଦେଶ ମାଟିକୁ ପବିତ୍ର କରଇ
କେତେ ପୁତ ନୀରା ନଦୀ l
ଉତ୍କଳର ଗଙ୍ଗା ବୈତରଣୀ ଯଥା
ବ୍ରାହ୍ମଣୀ ଓ ମହାନଦୀ l
ଉତ୍କଳ ଜନନୀ ବୀର ପ୍ରସବିନି
ଧନ୍ୟ ତା ସାହସୀ ସୁତ l
ମେଲି ଦେଇଥିଲେ ଦେଶ ଦେଶାନ୍ତରେ
ସାଗର ବକ୍ଷେ ବୋଇତ l
ଉତ୍କଳର ସୁତେ ଜୟ କରିଥିଲେ
ଗଙ୍ଗା ଠାରୁ ଗୋଦାବରୀ l
ଭାରତ ବକ୍ଷରେ ତୋଳି ଧରିଥିଲେ
ଉତ୍କଳ ମାତାର ଶିରି l
ତା ଗର୍ଭୁ ଜନମି ଭଞ୍ଜ ବୀରବର
କବି ସାହିତ୍ୟ ସମ୍ରାଟ l
ସାହିତ୍ୟ ସୃଜିଲେ ତୁଳନା ଯାହାର
ଦେବ ଭାଷାଟି ସଂସ୍କୃତ l
କବିସୂର୍ଯ୍ୟ, ଦୀନକୃଷ୍ଣ, ଅଭିମନ୍ୟୁ
କାବ୍ୟ କୁସୁମ ତୋଳିଲେ l
ଉତ୍କଳ ଜନନୀ ଗଳେ ଭକ୍ତିଭରେ
ମାଳା ଗୁନ୍ଥି ଲମ୍ବାଇଲେ l
ଉତ୍କଳର ବ୍ୟାସ ଜଗନ୍ନାଥ ଦାସ
ରଚିଲେ ଶ୍ରୀ ଭାଗବତ l
ଗଙ୍ଗାଠାରୁ ଗୋଦାବରୀ ଯାଏ
ଯାହା ଉତ୍କଳେ ହୁଅଇ ପାଠ l
ଉତ୍କଳ ବାଲ୍ମୀକି କବି ବଳରାମ
ଲେଖି ଦାଣ୍ଡୀ ରାମାୟଣ l
ପ୍ରଚାର କରିଲେ ଉତ୍କଳ ଭୂମିରେ
ମୋକ୍ଷଦାୟି ରାମ ନାମ l
ଉତ୍କଳର ଆଦିକବି ମହାକବି
ମହାତ୍ମା ଶାରଳା ଦାସ l
ବାଗ୍ଦେବୀ କୃପାରୁ ପରଷିଲେ
ଆଣି ମହାଭାରତର ରସ l
ସର୍ବ ଧର୍ମ ସମନ୍ଵୟ ସ୍ଥଳୀ ଏହି
ପୁଣ୍ୟ ଭୂମି ଭାରତର l
ବୁଦ୍ଧ ଶ୍ରୀ ଚୈତନ୍ୟ ମହାପ୍ରେମେ
କଲେ ବିଭୁ ନାମକୁ ପ୍ରଚାର l
ମଗଧ ସମ୍ରାଟ ଚଣ୍ଡାଶୋକ ଦିନେ
ଲଭି ଏ ମାଟିରୁ ଶିକ୍ଷା l
ଧର୍ମାଶୋକ ହୋଇ ପ୍ରଚାରିଲେ ପୁଣି
ସତ୍ୟ ଓ ଅହିଂସା ଦୀକ୍ଷା l
କେତେ ବଖାଣିବି ଉତ୍କଳ ମହିମା
ଜନ୍ମ ହୋଇଛି ସଫଳ l
ଧନ୍ୟମଣେ ମାତ ଗରବେ ମୁଁ ଆଜି
ଲଭି ତୋର ପୁଣ୍ୟ କୋଳ l
ପ୍ରତିଜ୍ଞା କରିଛି ଜୀବ ଥିବା ଯାଏ
ଗାଇ ତୋର ପୁଣ୍ୟ ଗୀର l
କର୍ତ୍ତବ୍ୟ ସାଧନେ ଉନ୍ନତ ରଖିବି
ମହିୟସୀ ତୋର ଶିର l