ବିଶ୍ୱକବି
ବିଶ୍ୱକବି
ଭାରତୀ ନନ୍ଦନ ସାହିତ୍ୟ ସ୍ୟନ୍ଦନ
ସାରଥୀ ଭାରତ କବି
ବିଶ୍ୱେ ତୋଳିଅଛ ବିଶ୍ୱକବି ତୁମ୍ଭେ
ଭାରତ ସାହିତ୍ୟ ଛବି l
ଜନଗଣ ମନ ଅଧିନାୟକ କବିନ୍ଦ୍ର
ରବୀନ୍ଦ୍ର ସାହିତ୍ୟାକାଶେ
କୋଟି ସୂର୍ଯ୍ୟ ସମ ସାହିତ୍ୟ କୁସୁମ
ଭବେ ତେଜ ପରକାଶେ l
କାବୁଲିଵାଲା ହେ ମିନି ଉପହାରେ
ଭରିଛ କାବୁଲି ପେଡ଼ି
କବିତା, ନାଟକ, ଗଳ୍ପ, ଉପନ୍ୟାସ
କେଡ଼େ ଯତନେ ସଜାଡ଼ି l
ବୀଣାପାଣିଙ୍କର ପଦେ ଅରପିଲ
ଗୀତମୟ ଗୀତାଞ୍ଜଳୀ
ଏକଲା ଚାଲରେ ଏକଲା ଚାଲରେ
ଧରି ମାତା ଅର୍ଘ୍ୟ ଥାଳି l
କବି, ଦାର୍ଶନିକ, ସାହିତ୍ୟ ସାଧକ
ଚିତ୍ରକର ହେ ମହାନ
ଚିତ୍ରିତ ବିଶ୍ୱରେ ବିଚିତ୍ର କବି ହେ
କବିଗୁରୁ ମହୀୟାନ l
ଗୁଣ ଚିହ୍ନିଥାଏ ଗୁଣିଆଁ ସିନା ସେ
ସୁନାକୁ ଚିହ୍ନେ ବଣିଆଁ
ମୋହନକୁ ମହାତମା କରିଦେଲ
ତୁମ ମହତ ପଣିଆଁ l
ଡ଼ାକଵାଲା ଆସି ଗୋରା ରାଇଜରୁ
ଚିଠିଟିଏ ଦେଇଗଲା
ଲଫାପା ଭିତରେ ବିଶ୍ୱ ପରିଚୟ
ନୋବେଲ ସମ୍ମାନ ଥିଲା l
ବିଶ୍ୱେ ପ୍ରଚାରଇ ଭାରତ ଭାରତୀ
କିରତୀ ବିଶ୍ୱ ଭାରତୀ
ହେ ବିଶ୍ୱ ବନ୍ଦନ କବି ଅଗ୍ରଗଣ୍ୟ
ତୁମ୍ଭ ଚରଣେ ପ୍ରଣତି ।