ବିପଦ ଯାଉ ତ ଟଳି
ବିପଦ ଯାଉ ତ ଟଳି
ଫିକା ଫିକା ଲାଗେ ମଳୟର ଛୁଆଁ
ପ୍ରିୟାର ପରଶ ଫିକା
ଝରୁ ନାହିଁ ରଙ୍ଗ ପୀୟୂଷ ପ୍ରୀତିରୁ
ପଶୁଛି ମନେ ଛନକା ।
କୋକୁଆ ଭୟରେ ଜର୍ଜରିତ ଏବେ
ଏ ଜଗତ ଜନମନ
ଘାରୁଅଛି ରୋଗ ବ୍ୟାଧି ମହାମାରୀ
ଜୀବନ ସଙ୍କଟାପନ୍ନ ।
ପୋକ ମାଛି ପରି ଯାଉଛନ୍ତି ମରି
ବଡ଼ ଅସାଧ୍ୟ ବେମାରୀ
ନୂଆ କୋଭିଡର ମାରକ ଭୂତାଣୁ
ସଙ୍କ୍ରମଣ ତୀବ୍ର ଭାରି ।
କରନାହିଁ ଊଣା ମନ ପ୍ରିୟତମା
ଜରୁରୀ ସାବଧାନତା
ମୁହଁ ନାକ କାନ ରଖିବା ଘୋଡାଇ
ପାଳନୀୟ ସତର୍କତା ।
ସାବୁନ୍ ଲଗାଇ ଧୋଇବା ହାତକୁ
ସମୟାନ୍ତେ ବାରମ୍ବାର
ବିପଦ ସମୟେ ଘରୁ ବାହାରକୁ
ଯିବା ନାହିଁ ଅକାରଣ ।
ବଜାୟ ରଖିବା ନିଶ୍ଚୟ ଦୂରତା
ଭିଡ଼ ଠୁ ରହିବା ଦୂରେ
ସଚେତନତା ହିଁ ନିହାତି ଜରୁରୀ
ନିବାରଣ ରୋଗ କରେ ।
ଆସ ନେବା ପ୍ରିୟା ପ୍ରଥମେ ସଙ୍କଳ୍ପ
ସଂଗ୍ରାମ ରଖିବା ଜାରି
ସୁରକ୍ଷିତ ରହୁ ସୃଷ୍ଟିରେ ଜୀବନ
ବିପଦ ଯାଉ ତ ଟଳି ।