Library
Profile
ବିଜୟା ଦଶମୀ
ବିଜୟା ଦଶମୀ
ନିର୍ମଳ ଆକାଶେ ଶରତ ର ଚାନ୍ଦ
ମର୍ତ୍ତ୍ୟେ ଆଣିଲା ବାରତା
କାଶତଣ୍ଡୀ ନାଚି ଶ୍ଵେତ ଚାମରରେ
ମାତା ସମ୍ଭାଷଣ କଲା ।
ଆଶ୍ୱିନ ମାସର ଶୁକ୍ଳ ଦଶମୀ ଯେ
'ଦଶହରା' ନାମେ ଖ୍ୟାତ
ଏ ଦିବସ ସଙ୍ଗେ ବିଜୟ ଜଡିତ
'ବିଜୟା ଦଶମୀ' ସେତ |
ସତ୍ୟ ଯୁଗେ ଦୈତ୍ୟ ମାନଙ୍କ ଉତ୍ପାତ
ବ୍ରହ୍ମା ବରେ ବଳୀୟାନ
ଦେବତା ମାନଙ୍କ ନିଦ ଉଡାଇଲା
ସର୍ବେ ଚ଼ିନ୍ତା ରେ ମଗନ |
ଶୁମ୍ଭ, ନିଶୁମ୍ଭ ଓ ରକ୍ତବୀର୍ଯ୍ୟ ପୁଣି
ଧୂମ୍ରାକ୍ଷ ଓ ଚଣ୍ଡ ମୁଣ୍ଡ
ମଧୁ କୈଟବଙ୍କ ସଙ୍ଗେ ମହିଷା ଯେ
ଦେବେ ଦେଉଥିଲା ଦଣ୍ଡ |
ଦେବ ଶକ୍ତି ନେଇ ମାତା ଙ୍କର ସୃଷ୍ଟି
ଦୁର୍ଗତୀ ନାଶିବା ଅର୍ଥେ
ଆବିର୍ଭୁତ। ମାତା ଦୁର୍ଗା ରୂପେ ପୁଣି
ଦେବ ଆୟୁଧ ଯେ ସାଥେ |
ଅନ୍ୟାୟକୁ ବଧି ନ୍ୟାୟ ପ୍ରତିଷ୍ଠାରେ
ଅସୁର ଙ୍କ ହତ ହୁଏ
ମହିଷା ବିଜୟ ମାତା ଦୁର୍ଗା ପୁଣି
ମହିଷ ମର୍ଦ୍ଦିନୀ ହୁଏ |
ଏଇ ତିଥିରେ ବି ଶ୍ରୀରାମ କରନ୍ତି
'ଅକାଳ ବନ୍ଧନ ' ପୂଜା
ମାତା ଙ୍କ ପରୀକ୍ଷା ଶ୍ରୀରାମ ସଫଳ
ବିଜୟୀ ବରେ ଯେ ରାଜା ।
ବିଜୟୀ ବରରେ ତୃପ୍ତ ରାମଚ଼ନ୍ଦ୍ର
ବିଶ୍ରବା ନନ୍ଦନ ବଧ
ନ୍ୟାୟ ପ୍ରତିଷ୍ଠାରେ ବିଜୟୀ ଲଭନ୍ତି
ଆସାଧ୍ୟ ହୋଇଲା ସାଧ୍ୟ ।
ନବରାତ୍ରୀ ପରେ ଆସେ ଦଶହରା
ବସୁନ୍ଧରା ଉତ୍ଫୁଲ୍ଲିତ
ଶରତ କରିଛି ମର୍ତ୍ତ୍ୟ କୁ ସରଗ
ବିଜେ କରିବେ ଯେ ମାତ ।
ଶାରଦୀୟ ମନ୍ତ୍ରେ ଧରଣୀ କମ୍ପିତ
ଧରଣୀ ବାସିନ୍ଦା ମଗ୍ନ
ଗ୍ରାମରୁ ସହର ପାର୍ବଣ ଛୁଆଁରେ
ମାତା ପାଇଁ ଯେ ଉଦ୍ବିଗ୍ନ |
ମୃଣ୍ମୟୀ ମୂର୍ତ୍ତି ର ସ୍ଥାପନା ହେଉ ବା
ହେଉ ଦେବାଳୟ ମୂର୍ତ୍ତି
ମାତୃ ପୂଜା ପାଇଁ ଚ଼ଳ ଚଞ୍ଚଳତା
ସବୁରି ମନରେ ସ୍ଫୁର୍ତ୍ତି |
'ବିଜୟା ଦଶମୀ' ବିଜୟ ର ପର୍ବ
ସତ୍ୟ ବିଜୟ ଅସତ୍ୟେ
ଏ ପୁଣ୍ୟ ତିଥିରେ ''ପୁଣ୍ୟ' ର ବିଜୟ
ପାପ ଯେ ହୁଏ ନିପାତେ ।
'ବିଜୟା ଦଶମୀ' ବିଜୟ ପର୍ବରେ
ଆଶିଷ ଦିଅ ଜନନୀ
ଆସୁରିକ ଗୁଣ ବିଲୁପ୍ତ ହେଉ ମାତା
ହେଉ ପୁଣ୍ୟର ପ୍ଲାବନୀ |
ପ୍ରତି ଅନ୍ତରର ପୁଣ୍ୟ ଭାବ ଭରି
ବିଜୟ ହେଉ ସତ୍ୟର
ଧର୍ମର ଡଙ୍ଗାରେ ସୋହାର୍ଦ୍ଦ ଆହୁଲା
ବିଜୟ ହେଉ ପୁଣ୍ୟର ।
ନାରୀ ଶକ୍ତି ର ତୁ ଅଦ୍ଭୁତ ଗାରିମା
ଶକ୍ତି ସ୍ଵରୂପିଣୀ ମାତା
ମାନବିକ ବୋଧ ବିଜୟ ଆଣୁ ମା'
କ୍ଷୁର୍ଣ୍ଣ ହେଉ ଯେ ପଶୁତା |
ହିଂସା, ଦ୍ଵେଷ, ମିଥ୍ୟା, କ୍ରୋଧ ପରେ ମାତା
ପ୍ରେମର ବିଜୟ ହେଉ
ବସୁନ୍ଧରା ହେଉ ପ୍ରୀତିମୟ ପୁଣି
ପୁଣ୍ୟ ଗଙ୍ଗା ବହି ଯାଉ ।
