ଭୟାନକ ଜଙ୍କସନ୍
ଭୟାନକ ଜଙ୍କସନ୍
ବାପାଙ୍କ କାନ୍ଥଟଙ୍ଗା ଫଟୋରେ
ମଉଳା ଶୁଖିଲା ଫୁଲମାଳ
ପଙ୍ଖା ପବନରେ ଦୋହଲୁଥାଏ
ମୋତେ ଦେଖିଲେ
ଚଢ଼େଇ ଡେଣା ଝାଡିଲା ପରି
ଫଡ଼ ଫଡ଼ କରି କିଛି କହୁଥାଏ ।
"ବାପା ଯେବେ ପୁଅ ହେବୁରେ
ବୁଝିବୁ ଦାୟିତ୍ଵର ଓଜନ ତେବେରେ "
ବାପା ଗଲେଣି ଆରପାରିକୁ
କେତେ ଦିନୁ
ମୁଁ ବି ଦୁଇଟା ପିଲାର ବାପା
ହେଲିଣି ଏ ସନୁ
କିନ୍ତୁ ବୁଝାପଡ଼େନା
ସଂପର୍କର ଡୋରି
ସ୍ଵାର୍ଥ ରଜ୍ଜୁରେ ଟଣା
ସଭିଏଁ ସବୁରି
ବାପାଙ୍କ ଶବ ପାଖରେ
ଲୋକେ ହାଉଯାଉ
ପ୍ଲାଷ୍ଟିକ କାନ୍ଦଣା ସମବେଦନା
ବାରିପଡ଼େ ଘଡିକେ ଥାଉ ।
ଚାଙ୍ଗୁଡ଼ି ବନ୍ଧା ଚାଲିଛି ଅଗଣାରେ
କେତେ ଅଣ୍ଡାଳି ଚାଲିଛନ୍ତି
ତକିଆ ତଳ ପଲଙ୍କ ତଳ
କାନ୍ଥରେ ଟଂଗା କମିଜର
ଛାତି ପକେଟ ଫାଳ ଫାଳ ।
କିଏ ଖୋଲିଲାଣି କାଠ ଆଲମାରୀ
କିଛି ପାଇଲେନି ବୋଲି
ମୁହଁ ଆମ୍ବିଳା କରି ତୁହାକୁ ତୁହା ଗାଳି
ବର୍ଷଣ କରୁଥିଲେ ଲଗେଇ ପାଳି ।
କଂଜୁସ ବୁଢ଼ା ହାରାମଜାଦା
ନାଆଁ ଧରିଲେ ଖାଇବାକୁ ମିଳିବନି
ଅଦା କଦା କଦବା
ଅଧୁଲି ସୁଉକି ବି ରଖିନି
ପେନସନ୍ ଟଙ୍କା ବି ଦିଶୁନି
ହାତରେ ପଡିଲାନି ।
ବାପାଙ୍କ ସମଲେଶ୍ଵରୀ
ଗୁଡାଖୁ ଡବା
ପାନ ବଟୁଆ
ବିଣ୍ଡି ବାଣ୍ଡୁଳି
ଝକମକି ପଥର
ଦୁକ୍ତ।ଗୁଣ୍ଡି ମୁଣି
କଳା ଖୋର୍ଦ୍ଧା ଲୋଚାକୋଚା ଲୁଙ୍ଗି
ଧୋତି କେଇ ଖଣ୍ଡ
ଗୋଟିଏ ପରେ ଗୋଟିଏ ଫେୋପାଡି ଚାଲିଛି
ବାହାରକୁ ଅଗଣାକୁ ।
ଚିଲ୍ଲେଇକି ଶୁଭୁଥାଏ
ବୁଢାର କିଛି ବି ଜିନିଷ ମୋ ଘରେ
ରଖେଇ ଦେବିନି
କିଛି ଚାପା ଗୁଞ୍ଜିରଣ
ଝାଣ୍ଠୁଆଣି ବୋହୁ ପାଖରେ ଏ ବୁଢା
ତିଷ୍ଟି ଥିଲା କେମିତି
ମରି ଯାଇଛି ତରି ଯାଇଛି ସେମିତି ।
ମୋ ଆଖିରେ ଲୁହ ଶୁଖି ଯାଇଥାଏ
ଛାତି ତଳେ ବିଶାଳ ଶୂନ୍ୟତା
ମଥାପିଟି କହୁଥାଏ ଝିଙ୍ଗାସୁଥାଏ
ସଂପର୍କର ଡୋରୀରେ କୀଟାଣୁ ଦଙ୍ଗଶନ
କରେ।ନା ଭୂତାଣୁ ଠାରୁ ଭୟାନକ ଜଙ୍କସନ ।