ଭୋଟର ମୁଁ ଇଜିମାଲିଆ

ଚିନ୍ତାରେ ପଡ଼ିଛି ଧେଡ଼ ଅଜା ଏବେ 

               କାହାକୁ ସେ ଦେବ ଭୋଅଟ

ମିଳିବନି ତାକୁ ମଦ କି ମାଉଁସ 

               ମିଳିବନି ଅବା ନୋଅଟ ।

ବଡପୁଅ ପରା ହାତରେ ବଇଚି 

               ଗାନ୍ଧୀ ଆଦର୍ଶକୁ ଧରି

କହୁଛି ବାପା ମୁଁ ଜିତିଗଲା ପରେ 

               ବୁଲେଇ ନେବି ଯେ ପୁରୀ ।

ବଡ ବୋହୂଟି ଯେ ଶଙ୍ଖର ଦଳରେ 

               ପାର୍ଟି ଅଛି ପାୱାରରେ

ଶଶୁରଙ୍କୁ କହେ ମୁଁ ଜିତିଗଲେ

               ନିତି ଗାଧୋଇବ ସାୱାରରେ ।

ସାନପୁଅ ପରା ଫୁଲରେ ବଇଚି 

               ଆଛେଦିନ ଆଣିବାକୁ

ଭଲ କରିଦେବ କହୁଛି ଜିତିଲେ 

               ବାପାର ପୁରୁଣା ଅର୍ଶକୁ ।

ବାକି ରହିଗଲା ନାତିଟା ମୋହର

               ଝାଡୁ ଦଳଆଡେ ଯାଆନ୍ତା

ଯିଏବି ଜିତିଲେ ଶାସନ ଡୋରିଟା

               ହାତ ପାହାନ୍ତାରେ ରହନ୍ତା ।