ଭୋକର ଭୂଗୋଳ
ଭୋକର ଭୂଗୋଳ
ଭୋକର ଭୂଗୋଳ ଦିଶେ ଜଳଜଳ
ଅଇଁଠା ଖଲିର ପତ୍ର
ପେଟ ବିକଳରେ ଚାଟୁଛି ଶିଶୁଟି
ଆମ ସମାଜ ର ଚିତ୍ର।
ଭୋକର ଭୂଗୋଳ ତା'ର ରୂପ ରେଖ
ଅତିକ୍ରମ କରି ସୀମା
ଅସହାୟ କେତେ ଭୋକର ପାଖରେ
ନ ମାନଇ ବୋଲ ଜମା।
ଭୋକର ଭୂଗୋଳ ଏତେ ଭୟଙ୍କର
କାରୁଣ୍ଯ ଭରା ଯନ୍ତ୍ରଣା
ବିଦ୍ରୁପ କରୁଛି ଦୁର୍ଭାଗ୍ୟ ଏମିତି
ଶିଶୁଟିକୁ କାହିଁ ଜଣା .....?
ଭୋକର ଭୂଗୋଳ ତାର କଳେବର
କୋଇଡାର ଶିଶୁ ପରା
ଫମ୍ପା ସେ ସଂଳାପ ବିକାଶର ମନ୍ତ୍ର
ଖଣି ଖାଦାନରେ ଭରା।
ଭୋକର ଭୂଗୋଳ ଅସହ୍ୟ ତା ଦାଉ
ଶିଶୁ ସେ'ତ ଅଭିଶପ୍ତ
ଛାତି ଫାଟି ଯାଏ ମାତୃତ୍ବ ମନରେ
ଦୁଃଖ ଟା କରେ କ୍ଷତାକ୍ତ।
ଭୋକର ଭୂଗୋଳ ନଗଡା,କୋଇଡା
ଅଞ୍ଚଳ କରୁଣ ଚିତ୍ର
କଙ୍କାଳ ସାର'ସେ ପୁଷ୍ଟିହୀନ ଶିଶୁ
ଚାଟୁଛି ଅଇଁଠା ପତ୍ର।
ଯୋଜନା ହୁଅଇ ଗରିବି ହଟାଅ
ଶ୍ଳୋଗାନ ରେ ନାରା ବାଜି,
ଲୁଟି ଖାଉଥାନ୍ତି ଅଧାବାଟେ କି'ଏ
ଖଣି ଆଉ ମାଟି ଆଜି।
ଖଣିଜ ସମ୍ପଦ ଭରା ଆମ ରାଜ୍ୟ
ଭୋକର ବିକଳ ଚିତ୍ର
ଦେଖି ବାକୁ ହୁଏ କେତେଯେ ଉତ୍କଟ
ଏଇ ନିକଟରୁ ମାତ୍ର।