ଭାରଣ୍ଡ ପକ୍ଷୀ କଥା
ଭାରଣ୍ଡ ପକ୍ଷୀ କଥା
ପଞ୍ଚତନ୍ତ୍ର କାହାଣୀରୁ ଗଳ୍ପ ଗୋଟେ ଭାଇ l
ମନେପଡ଼େ ଯାହା ମୁହିଁ ଦେଉଅଛି କହି ll
ସାଗରତୀରରେ ବାସ ବୁଲେ ଲଣ୍ଡ ଭଣ୍ଡ l
ପକ୍ଷୀ ତା ନାମ ଭାରଣ୍ଡ ଦୁଇଗୋଟି ମୁଣ୍ଡ ll
ସାଗର କୂଳରୁ ଖୁଣ୍ଟି ଖାଏ ପୋକ ଯୋକ l
ଏକୁ ଆନ ସହଯୋଗେ ଦୁଇଟି ତା ମୁଖ ll
ସାଗର ତୀରେ ଭାରଣ୍ଡ ଦିନେ ବୁଲୁଥିଲା l
ପ୍ରଥମ ମୁଖ ତାହାର ଫଳଟେ ପାଇଲା ll
ଅମୃତ ପ୍ରାୟ ସ୍ୱାଦିଷ୍ଟ ଥିଲା ଫଳ ଗୋଟି l
ଖାଇବା ପାଇଁ କନ୍ଦଳ କଲେ ବେନି ପାଟି ll
ପ୍ରଥମ କହିଲା ମୁଁ ଯେ ଫଳ ଅଛି ପାଇ l
ଏକଲା ଭକ୍ଷିବି ମୁହିଁ ତତେ ଦେବି ନାହିଁ ll
ଦ୍ୱିତୀୟ ମୁଖଟି ତେଣୁ ଚିନ୍ତାକଲା ମନେ l
ମୂର୍ଖ ପ୍ରଥମକୁ ମୁହିଁ ଦେବି ନିଶ୍ଚେ ପାନେ ll
ଅନ୍ୟଦିନେ ଦ୍ୱିତୀୟକୁ ଫଳଟେ ମିଳିଲା l
ଦୁର୍ଭାଗ୍ୟକୁ ତାହା ଏକ ବିଷ ଫଳ ଥିଲା ll
ଦ୍ୱିତୀୟ କହିଲା ତହୁଁ ପ୍ରଥମେ ଦେଖାଇ l
ଦେଖ ଏ ଫଳକୁ ମୁହିଁ ଦେଉଅଛି ଖାଇ ll
କୃତକର୍ମ ପାଇଁ ତୋର ଭୋଗ ଏବେ ଦଣ୍ଡ l
ପ୍ରଥମ କଥା ନମାନି ମଲା ସେ ଭାରଣ୍ଡ ll
ବିଷ୍ଣୁଶର୍ମା ରାଜ ପୁତ୍ରେ ଏ କାହାଣୀ କହି l
ସାର ମର୍ମ କି ରହିଲା କହିଲେ ବୁଝାଇ ll
ପରସ୍ପର ମଧ୍ୟେ ଯେବେ ବୁଝାମଣା ଭଲ l
ଯୁଗ୍ମ ଭାରିଜା ଥିଲେ ବି ସୁଖେ ଯାଏ କାଳ ll