ବେଳାଭୂମି
ବେଳାଭୂମି
ସ୍ମୃତି ବେଳାଭୂମି ପଡିଛି ଉଜାଣି
ଆଜି ଗୋ ମୋପାଇଁ ପ୍ରିୟା
ମନେପଡେ ଯେବେ ସେହି ଅନୁଭୂତି
ଏବେବି ଲାଗେ ମୋତେ ନୂଆ ।
ବାଲୁକା ଉପରେ ବସିଥିଲେ ଆମେ
ଦୁଇଜଣ ପାଖାପାଖି
ସମୁଦ୍ର ତରଙ୍ଗ ଛୁଉଁଥିଲା ଆମକୁ
ମିଶି ଯାଉଥିଲା ଆମ ଆଖି ।
ତୁମ ଓଠେ ଥିଲା ସପନ ଚୁମ୍ବନ
ବେଳା ଦେଖୁଥିଲା ମଜା
ମୁଁ ଦେଖୁଥିଲି ଶୁଭ୍ର ତରଙ୍ଗରେ
ତୁମ ଦେହ ଭିଜା ଭିଜା l
ମୋମନ ରାଇଜର ନୀଳପରୀ ତୁମେ
ମିଳନ ପିଆସୀ ପ୍ରିୟା
ପ୍ରେମ ପୃଥିବୀର ପ୍ରୀତି ଫୁଲ ତୁମେ
ରୂପା ଝରା ତୁମ କାୟା l
ବହୁ ପ୍ରତୀକ୍ଷିତ ପିପାସିତ ଓଠେ
ତୁମେ ମୋ ଉଷ୍ଣ ଚୁମ୍ବନ
ପ୍ରେମର ଯଜ୍ଞରେ ପ୍ରଣୟ ଆହୁତି
ମିଳନର ମନ୍ତ୍ର ଗାନ l
ପ୍ରଥମ ବର୍ଷାର ଛାତିପରେ ତୁମେ
ଭୁରୁ ଭୁରୁ ମିଠା ବାସ୍ନା
ନବ ବିବାହିତା ବଧୂ ନୟନରେ
ରତୀ ମନ୍ମଥର ତୃଷ୍ଣା l
ମାଘ ପଉଷର ଶୀତୁଆ ରାତିରେ
ତୁମେ ଯେ ଦେହର ତାତି
ଅଳସୀ ପ୍ରିୟାର ଆଲିଙ୍ଗନ ତୁମେ
ମିଳନ ପରର ତୃପ୍ତି l
ତୁମ ଆଶ୍ଳେଷରେ ଯେବେବି ବିତିଛି
ଏ ବେଳାଭୂମି ରେ ରାତି
ମରୁଭୂମିପରେ ଆସିଛି ବନ୍ୟା ଗୋ
ଦୁଃଖର ହୋଇଛି ଇତି l
ସେହି ସ୍ମୃତି କେବେ ଭୁଲି ମୁଁ ପାରିନି
ରହିଛି ଅଲିଭା କାଳିରେ ଲେଖା
ତୁମେ ଗଲାପରେ ସେହି ସ୍ମୃତି ଆଜି
ମୋ ମନର ଅଭିଲେଖା ।