Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Hrushikesh Satpathy

Inspirational

3  

Hrushikesh Satpathy

Inspirational

ବାପା

ବାପା

1 min
96


ବାପା ଡାକଟିରେ ଅମୃତ ତ ଥାଏ

    ଥାଏ ମନ୍ଦିର ମହକ

ମର୍ମ ମନ୍ଦିରର   ଚଳନ୍ତି ଠାକୁର

  ସୌମ୍ୟ,ସାନ୍ତ୍ୱନା ପ୍ରତୀକ ।

ସାନ୍ତ୍ୱନା,ସାଧନା,ସଂକଳ୍ପ,ପ୍ରେରଣା

    ସନ୍ତୁଳନ,ସମାହାର

କୋଟିଏ ପୁଣ୍ୟର ଗୋଟିଏ ପାଖୁଡା

   ଚିର ନମସ୍ୟ ସମ୍ଭାର ।

ସଞ୍ଜର ଆଳତି ଦିବ୍ୟ ଚକ୍ଷୁ ଜ୍ୟୋତି

    ସକାଳର ଶୁଭ ଶଙ୍ଖ

ସେ ଶଙ୍ଖରୁ ଅର୍କ   ଅମୃତ ନାଦରୁ

    ଝରିଥାଏ ଆଶାଲୋକ ।

ଦୁଇ ବାହୁ ଥାଇ   ଚତୁର୍ଭୂଜ,ସିଏ

    ସ୍ଥିର ସୁରକ୍ଷା ବଳୟ

ସନ୍ତାନର ପାଇଁ  ସନ୍ତାନଙ୍କୁ ନେଇ

   ରଚନ୍ତି ରମ୍ୟ ନୀଳୟ ।

ହାଡଭଙ୍ଗା ତାଙ୍କ ସତ୍ୟନିଷ୍ଠ କର୍ମ

  ତ୍ୟାଗରେ ତ୍ୟାଗରେ ତୃପ୍ତ

ସନ୍ତାନ ସୁଖର ଆଶାୟୀ,ଆକାଂକ୍ଷୀ

   ଅପ୍ରାପ୍ତରେ ସଦା ପ୍ରାପ୍ତ ।

ପ୍ରାପ୍ତି ପାଇଁ କେବେ ବ୍ୟାକୁଳ ନୁହନ୍ତି

   ମର୍ତ୍ତ୍ୟର ସେ ମହାଦାତା

ସନ୍ତାନର ପାଇଁ  ସନ୍ତାନକୁ ନେଇ

   ହୃଦେ ସ୍ଥିର ବଦାନ୍ୟତା ।

ମାଆ କୋଳ ମୋର ଖେଳର ମନ୍ଦିର

   ବାପା କୋଳ ଜ୍ଞାନ ଘର

ଜ୍ଞାନ ଗରୀମାର  ଭାଗ୍ୟ ଭବିଷ୍ୟତ

   ଆଶୀର୍ବାଦର ଭଣ୍ଡାର ।

ଆଶୀର୍ବାଦ ତୁମ ସ୍ୱତଃ ଦିବ୍ୟ ଝର

   ମାଗିବାକୁ ପଡେ ନାହିଁ

ଆଲ୍ହାଦ ଆନନ୍ଦ  ସବୁ ଦେଇଦିଅ

   ଲୁଚି ଲୁଚି ଲୁହ ପିଇ ।

କାହିଁକି ତାହେଲେ ମନ୍ଦିର ମୁଁ ଯିବି

   ପୁଣ୍ୟ ଅର୍ଜିବାର ପାଇଁ!

ଧର୍ମ, କର୍ମ, ଭାଗ୍ୟ, ଚିନ୍ତା ଚେତନାର

   ଜନ୍ମ ଜନ୍ମର ଗୋସାଇଁ ।

ଭାଜ୍ୟ, ଭାଜକ ବା ଭାଗଫଳ ପାଇଁ

  କେବେ ମୁଁ ବ୍ୟାକୁଳ ନୁହେଁ

ତୁମେ ମୋ ଭାଜକ, ତୁମେ ଭାଗଫଳ

   ତୁମ ଜ୍ଞାନେ ଜ୍ଞାନୀ ହୁଏ ।

ସେ ଗୁଣ ତର୍ଜମା  କରିବା ଉପମା

  ନାହିଁ ମୋ ଶବ୍ଦ ଭଣ୍ଡାରେ

ଜନମ ଜନମ   ସନ୍ତାନତ୍ୱ ପାଇଁ

   ସବିନୟ ଅଳି କରେ ।


Rate this content
Log in