ଅତିରୁ ଇତି
ଅତିରୁ ଇତି
ଯୁଗେ ଯୁଗେ ଏହା ହୋଇଛି ବିଦିତ
ଇତିହାସ ଅଟେ ସାକ୍ଷୀ
କ୍ଷୀର ଉତୁରିଲେ ପଡ଼ଇ ଚୁଲିରେ
ଚାହିଁ ଥିବ ନିରିମାଖି
ଅତି ଚିପୁଡ଼ିଲେ ପିତା ହୁଏ ଲେମ୍ବୁ
ସତ୍ୟ ଅଟେ କାଳ କାଳ
ଅତି ସ୍ନେହ କଲେ ପୁତ୍ର ବୁଦ୍ଧି ନାଶ
ବୁଡେ ବାପୁଡ଼ାର କୂଳ
ଅତି ଆଗ୍ରହରେ ଅଧିକ ଭୋଜନ
ଦିଅଇ ପେଟକୁ କଷ୍ଟ
ଅତି ପରିଶ୍ରମ ଅବା ସେ ବ୍ୟାୟାମ
ଶରୀରରେ ପରିଦୃଷ୍ଟ
ପୁରାଣେ ବର୍ଣ୍ଣିତ ଅତି ଦାନ କଥା
ଅତି ଗର୍ବ ଅଭିମାନ
ଅତିରୁ ଇତିକୁ ଲଭିଲେ ସଭିଁଏ
ହଜିଗଲା ବଂଶ ଚିହ୍ନ
ଅତିବ ଚିନ୍ତାରେ ମସ୍ତିଷ୍କ ଓଜନ
ବଢ଼ିଥାଏ ରକ୍ତଚାପ
ଅତି ଲବଣର ସେବନେ ବିଗିଡେ
ନିଜ ଶରୀରର ରୂପ
ଅତି ବରଷାରେ ଡୁବଇ ଧରିତ୍ରୀ
ଚାଷୀ ମୁଖେ ହାହାକାର
ଅତିହେଲେ ଗ୍ରୀଷ୍ମ ଫାଟଇ ମେଦିନୀ
ଖେଳ ସେ ମୃଗତୃଷ୍ଣାର ।
ଆବଶ୍ୟକ ଠାରୁ ବେଶୀ ଉପଦେଶ
ଦେଲେ ମିଳିଥାଏ ନିନ୍ଦା
ଅତି ପ୍ରଶଂସା ଚୋରର ଲକ୍ଷଣ
ରଚେ ସେ ଗୋଲକ ଧନ୍ଦା
ବାହାଦୂରୀ ଅତି ମହଙ୍ଗା ସାବ୍ୟସ୍ତ
କଥା ମହାଭାରତର
ନିଜେ ଯିବ ନାଶ ଅତୀବ ସାହସ
କାରଣ ସର୍ବନାଶର।
ମହାପୁରୁଷଙ୍କ ଅକାଟ୍ୟ ଏ ଉକ୍ତି
ଅତିରୁ ହୁଅଇ ଇତି
ନମାନିଲେ ବ୍ୟକ୍ତି ଗାଇବ ନିଶ୍ଚିତ
ସରବନାଶର ଗୀତି।