ଅନୁଭୂତି
ଅନୁଭୂତି
କେବେ ବାଳୁତର ନିଷ୍ପାପ ମନରେ
କେବେ କୈଶୋରର ଚଞ୍ଚକତାରେ ...
କେବେ ଯୌବନର ଅସ୍ଥିର ମନରେ
ପୁଣି କେବେ ପରିପକ୍ୱ ଭାବନାରେ ...।
କେବେ ବାପା , ମା ର ସେନେହରେ
କେବେ ଜୀବନସାଥୀର ବାହୁବନ୍ଧନରେ ।
କେବେ ଶାଶୁଘର ଟାହିଟାପୁରା ରେ
ପୁଣି କେବେ ବନ୍ଧୁର ଥଟ୍ଟା ,ମଜାରେ ।
କେବେ ଶୀତୁଆ ପବନର ମାଦକତାରେ
ପୁଣି କେବେ ବସନ୍ତ ଋତୁର ନିଆରା ଛୁଆଁରେ
ମୋର ଏ ମନ ,ହୃଦୟ
ସାଉଁଟିଛି କେତେ ଅନୁଭୂତି ।।
ଆଜି କାଇଁ ମନରେ ଉଠେ ଏତେ ପ୍ରଶ୍ନ
ଯାହାର ସମାଧାନରେ ନାହିଁ ତ ଉତ୍ତର
ଭାବି ବସେ କାଇଁ ସେ ବିଗତ
ଯାହାର ସ୍ମରଣେ ମନ ହୁଏ ଅସ୍ଥିର ।
କାହାକୁ ମନ ଭାବେ ବନ୍ଧୁ ବୋଲି
କାହାକୁ ପୁଣି ସାଥୀ ବୋଲି
ହେଲେ ସଭିଏଁ ହଜାଇ ଦିଅନ୍ତି
ସକାଳର ଶେଫାଳି ପରି ।
କିଛି ଅନୁଭୂତି ଭରିଦିଏ ମଧୁରତା
କିଛି ଦିଏ ମନରେ ତିକ୍ତତା
କିଛି ଦେଇଥାଏ ଓଠରେ ଚେନା ଚେନା ହସ
କିଛି ଓଠକୁ ଦିଏ ଲୁହର ଲବଣତା ।
ତ୍ରିଂଶ ଭାଦ୍ରବର ପ୍ରତିଟି ପବନ
ହୃଦୟକୁ ଦେଇଛି ବିବିଧ ସପନ ।
ଜୀବନ ଥିବା ଯାଏଁ ଥିବ ସାଥୀ ହୋଇ
ମରଣ ଜୁଇରେ ଯିବ ଶୋଇ
ସେଇ ଅନୁଭୂତି .....
ଯାହାକୁ ଏ ମନ ପାଇଛି
କିଛି ହରାଇ ଆଉ କିଛି ପାଇ ।
ହେ ଅନୁଭୂତି ଥିବୁ ମୋର ପାଶେ
ଏ ଅସ୍ଥିର ମନର ସାଥୀଟେ ହୋଇ ।
ହେ ମୋର ଅନୁଭୂତି .....।