ଅମୂଲ୍ୟ ଜୀବନ

ସକାଳୁ ସକାଳୁ ଫୁଲଟିଏ ଦେଇ

ଆଈକୁ କହିଲେ ଅଜା

ଆଇ ଲଭ ଇଉ ସୁଇଟି ହାଆର୍ଟ

ଚାଲୁନୁ ଲୁଟିବା ମଜା ।

ଏକଷଠିତମ ବିବାହ ବାର୍ଷିକେ

ଜୀବନର ଶେଷବେଳେ

ନଉକା ବିହାର କରିବା ଟିକିଏ

ପ୍ରକୃତିର ସାଥୀମେଳେ ।

ଝିପିଝିପି ବର୍ଷା ପଡୁଥିଲା ଝରି

ଅଜା ଧରିଥିଲେ ଛତା

କଦଳୀ ପତର ମୁଣ୍ଡରେ ଘୋଡେଇ

ଆଈର ନଥିଲା ଚିନ୍ତା ।

ବଙ୍କୁଲି ବାଡ଼ିରେ ଆହୁଲା ମାରିଣ

ଅଜା ଚଳାଇଲେ ନାଆ

ଆଈ ବସିଥିଲା ନଉକାକୁ ଧରି

ବହୁଥିଲା ମୃଦୁ ବାଆ ।

କିଛି କ୍ଷଣ ପାଇଁ ଖୋଲା ହୃଦୟରେ

ହସୁଥିଲେ ଅଜା ଆଈ

ଅମୂଲ୍ୟ ଜୀବନ ଉପଭୋଗ କର

ବାର୍ତ୍ତା ଯାଉଥିଲେ ଗାଇ ।