ଅମର ଶହିଦ୍
ଅମର ଶହିଦ୍
ମରିନାହିଁ ସେ ତ ମରିନାହିଁ
ମାଆ ମାଟି ପାଇଁ ଭୟ ଯା'ର ନାଇଁ
ମରଣକୁ ସିଏ ବରିନାହିଁ ।
ମାରି ଶତୃଗଣେ ଲଢି ଯିଏ ରଣେ
ପଛଘୁଞ୍ଚା କେବେ ଦେଇନାହିଁ
ମମତାର ଡୋରି ପାଇଁ ରକ୍ତ ହୋଲି
ଖେଳିବାକୁ ଶଙ୍କା ନେଇନାହିଁ ,
ନିଜ ସୁଖ ଚିନ୍ତା କରିନାହିଁ
କରିଛି ସମର ରହିବ ଅମର
ମରିନାହିଁ ସେ ତ ମରିନାହିଁ ।
କୋଳେ ମଥା ଥୋଇ ଯାଇଛି ସେ ଶୋଇ
ଶେଷ ନିଦ୍ରାରୁ ଯେ ଉଠିନାହିଁ
ବିଜୟର ନେତ ଉଡାଇଛି ସେ ତ
ଦେଖିବାର ଭାଗ୍ୟ ଯୁଟିନାହିଁ ,
ପ୍ରାଣଭୟେ ଶେଷେ ଥରିନାହିଁ
ଶହିଦ ସେ ବୀର ପଡିଅଛି ଧୀର
ମରିନାହିଁ ସେ ତ ମରିନାହିଁ ।
ମାଆ ମାଟି ପାଇଁ ମଥା ସେ ନୁଆଁଇ
ସମର୍ପଣେ ଯୁଦ୍ଧ ଟାଳିନାହିଁ
ଦର୍ପରେ ତୁହାଇ ରୁଧିର ବୁହାଇ
ଟୋପାଏ ବି ଲୁହ ଢାଳିନାହିଁ ,
ଭୀରୁ ସମ କାହିଁ ଡରିନାହିଁ
ତା' ଚରଣ ତଳେ ପୂଜଇ ମୁଁ ବଳେ
ମରିନାହିଁ ସେ ତ ମରିନାହିଁ ।
ପ୍ରସନ୍ନ କୁମାର ମାଦଳା