ଅଳି (ଭ୍ରମର)

ପ୍ରକୃତିର ଏକ ଛୋଟ କୀଟ ଅଳି

ଫୁଲରୁ ରସ କୁ କରେ ଗ୍ରହଣ,

ଫୁଲରୁ ଫୁଲକୁ ଉଡ଼ିବୁଲୁଥାଏ

କାହିଁ କେତେ ଦୂର କରି ଭ୍ରମଣ l

ବସନ୍ତ ଋତୁରେ ଫୁଲ ମହୋତ୍ସବ

ସାଜିଥାଏ କେତେ କାନନେ ଭରା,

ଭୃଙ୍ଗ ବ୍ୟସ୍ତ ହୋଇ ଏଫୁଲୁ ସେ ଫୁଲୁ

ଉଡ଼ିବୁଲୁଥାଏ ଦିବସ ସାରା l

କଳା ତାର ରଙ୍ଗ ଅସୁନ୍ଦର ବୋଲି

କରନ୍ତିନି ତାକୁ କେହି ଆଦର,

ଭଅଁ ଭଅଁ ହୋଇ ଶବ୍ଦ କରୁଥାଏ 

କାଠ ବାଉଁଶରେ କରଇ ଘର l

ପରାଗ ସଙ୍ଗମ ହୁଏ ତାହାଦ୍ୱାରା

ସିଏତ ଅଟଇ କରମ ଯୋଗୀ,

ପ୍ରକୃତିର ଉପକାର କରିଥାଏ

ଫଳ ସୃଷ୍ଟିସିନା ତାହାର ଲାଗି l

ଫୁଲର ସୁବାସେ ଆକର୍ଷିତ ହୁଏ

କଵି ଆଖିରେ ସେ ଫୁଲ ରସିକ,

ଯିଏ ଯାହା ତାକୁ କହୁନା କାହିଁକି

ଫୁଲସହ ଯୋଡ଼ା ଜୀବନ ଯାକ l

ପ୍ରଜାପତି ଆଉ ମଧୁକୀଟ ଆଦି

ଅଟନ୍ତି ତାହାରି ଜାତୀୟ କୀଟ,

ସଂସାରକର୍ତ୍ତା ଙ୍କ ମଧୁମୟ ସୃଷ୍ଟି

ସୃଷ୍ଟି କର୍ମ ପାଇଁ ଲୋଡ଼ା ନିୟତ l