ଅଭିସାର
ଅଭିସାର
କୁଞ୍ଜ ଶୋଭାବନ ଉଲ୍ଲସିତ ମନ
ମାଧବ ମଧୁସୂଦନ
ସୁସ୍ୱରେ ସଘନେ ଶୁଭେ ପିକ ଡାକ
ସୁମଧୁର ବେଣୁ ସ୍ୱନ ।
ସଧୀରେ ବହୁଛି ମଳୟ ମରୂତ
ସବୁଜ ନବ ପଲ୍ଲବ
ଡାକୁଛନ୍ତି ହରି ଭକ୍ତେ ହାତଠାରି
ଆସ ନକର ବିଳମ୍ବ ।
ହରଷ ମନରେ ସାତ୍ତ୍ଵିକ ଭାବରେ
ପ୍ରଭୁଙ୍କର ଅଭିସାର
ଲଭିଲେ ସାନ୍ନିଧ୍ୟ ପରମ ଆନନ୍ଦ
ସନ୍ତୋଷ ଦିଏ ଅପାର ।
ନବଘନ ଶ୍ୟାମ ମୋହନ ମୂରତି
ଅଧରର ଦରହାସ୍ୟ
କିଣିନିଏ ମନ ହରଇ ବିଷାଦ
ପାପ ତାପ କରେ ନାଶ ।
ସଦୟ ହୃଦୟ ଶ୍ରୀକୃଷ୍ଣ କେଶବ
ଜଗନ୍ନାଥ ନାରାୟଣ
ହୁଅନ୍ତୁ ସହାୟ ଆପଦ କାଳରେ
ନିସ୍ତରନ୍ତୁ ସୁଧୀଜନ ।