ଅଭିନୟ

ଆଖି ତଳେ ଲୁଚିଥିବା କୋହର କୁହୁଡ଼ିରେ

ପୋଡିଯାଏ ସ୍ଵପ୍ନର ବଉଳ

ଅନ୍ୟମନସ୍କ ମନ ବାରବାର ଭେଟୁଥାଏ

ଉତ୍ତର ବିହୀନ ପ୍ରଶ୍ନ ।

ପାହାଡ଼ ସେପାରେ ଲୁଚିଯାଉଥିବା ସୂର୍ଯ୍ୟ

ମୋ ଅବଶ ବିବଶ ଦେହେ

ଗୋଲାପି ରଙ୍ଗ ବୋଳିଦିଏ ସିନା

ଆଶ୍ବାସନାର ହାତ ପାପୁଲିଟେ ଲମ୍ବିଆସେନା

ମଥା ଉପରକୁ,

ପୁନର୍ବାର ସ୍ବପ୍ନଭଙ୍ଗର ସ୍ମୃତି ଚାରଣେ

ଜଳୁଥାଏ ତିକ୍ତ ହୃଦୟ

ନିସଙ୍ଗତାର ନୀଳ ବହ୍ନିରେ ।

ମଥାରେ ହାତ ଦେଇ ବସି ପଡୁପଡୁ

ଜୀବନ ମତେ ବାଧ୍ୟ କରେ ଉଠିବାକୁ,

ଶୁଖିନଥାଏ ଆଖିରୁ ଲୁହ

ମତେ କିନ୍ତୁ ହସିବାକୁ ପଡ଼େ ପୁନର୍ବାର । ।

-------

ପ୍ରକାଶ ରଂଜନ ପରିଡ଼ା

'ନିଶିପ୍ରଦୀପ', କଏଳପାଳ, ବାତୋ, କେନ୍ଦୁଝର