ଆଶରାଟି ତା'ର ବଳ

       କଖାରୁ ଲତାଟେ ମୋ ଘର ବାଡ଼ିରେ

              ଯାଉଥିଲା ମାଡ଼ି ମାଡ଼ି

       ଦେଖିବାକୁ ତାକୁ ଆସିଗଲି ଦିନେ

              ସବୁକାମ ମୋର ଛାଡ଼ି ।

       ଦେଖିଲି ମୁଁ ତା'ର ହସ ହସ ଭାବ

              କଅଁଳ କୁଆଁରୀ ମନ

       ଧାରା ଶିରାବଣ ବରଷାରେ ଭିଜି

              ଦିଶୁଥିଲା ଛନଛନ ।

       ତା' ସପନ ତା'ର ଗୋପନ କଥାଟି

              ପାରୁ ନ ଥିଲି ମୁଁ ଜାଣି

       ହେଲେ ମନୋହର ଦିଶୁଥିଲା ମୋତେ

              ତା'ର ସୁକୋମଳ ଠାଣି ।

       ଭାବି ଭାବି କେତେ ହସିଦେଇ ଟିକେ

              ପଚାରିଲି ତାକୁ ମୁହିଁ

       କହ ମୋତେ ଆଗୋ ସରମୀ ଲତିକା

              କୁଆଡ଼େ ଯାଉଛୁ ତୁହି ।

       କହିଲା ବଢ଼ିବି ଫୁଟାଇବି ଫୁଲ

              ଫଳାଇବି ପୁଣି ଫଳ

       ପୂରଣ କରିବି ମୋ ଆଶା, ସପନ

              ସେଲାଗି ଖୋଜୁଛି ବଳ ।

       ହେବୁ କିରେ ମୋର ଆଶା ଭରସା ତୁ

              ପଚାରୁଛି ମୁହିଁ ତୋତେ

       ଲତାଟିଏ ବୋଲି ଖୋଜୁଛି ଆଶରା

              କହ ତୁ ଦେବୁ କି ମୋତେ ।

       ତା' ପାଇଁ ଆଶରା ତିଆରି ଦେଲି ମୁଁ

              ବୁଝିପାରି ତା'ର କଥା

       ଦେଖିଲି ତା' ଖୁସି ତା'ର ମିଠା ହସ

              ଚାଲିଲା ଟେକି ସେ ମଥା ।

       ଦିନ କେତୁଟାରେ ଫୁଟାଇଲା ଫୁଲ

              ଫଳାଇଲା କେତେ ଫଳ

       ବୁଝିଗଲି ମୁଁ ଯେ ଲତାଟିଏ ସେ'ଯେ

              ଆଶରାଟି ତା'ର ବଳ ।