ଆମ ପିତାମାତା ଚଳନ୍ତି ଦେବତା

ଦୁନିଆ ଦେଖିଛି ଜୀବନେ ପିତାମାତା ଆଶିଷେ

ପ୍ରଥମ ଦେବତା ମୋହର ସଦା ଭକ୍ତି ପ୍ରକାଶେ ll

ଦୁର୍ଲ୍ଲଭ ଜନମ ପାଇଛି ଜନ୍ମ ହୋଇ କୋଳରେ

ସଂସାର ଦେଖିଛି ନୟନେ ଧରି ଚାଲେ ଦାଣ୍ଡରେ ll

ବିଦ୍ୟା ବୁଦ୍ଧି ଜ୍ଞାନ ପାଇଛି ସବୁ ତାଙ୍କ ମହିମା

ସମାଜେ ପ୍ରତିଷ୍ଠା ଲଭିଛି ଗାଏ ତାଙ୍କ ଗାରିମା ll

ଦୁଃଖ କଷ୍ଟ ସହି ଆମକୁ କରେ ସ୍ନେହ ଆଦର

ବିପଦେ ଆପଦେ ଦେଖାଏ ସତ୍ୟ ଶାନ୍ତି ମାର୍ଗର ll

ଅଭୟ ପ୍ରଦାନ କରନ୍ତି ପାଇ ସବୁ କଷଣ

କ୍ଷୁଧା ଇଛା କାମ ମେଣ୍ଟାନ୍ତି ସଦା କରି କଲ୍ୟାଣ ll

Advertisement

>

ନିଜେ ଜଳି ଜଳି ବତାନ୍ତି ମୋର ଜୀବନ ପଥ

ଯୋଗାନ୍ତି ସୁବିଧା ସୁଯୋଗ ନାନା କଷ୍ଟ ପାଇତ ll

ପାଇ ଉପଦେଶ ଆଦେଶ ମୋର ଜୀବନ ରଥ

ପ୍ରଗତି ପଥରେ ଆଗାଏ ପାଇ ଯେ ଆଶୀର୍ବାଦ ll

ଆମ ପିତାମାତା ଅଟନ୍ତି ପରା ଗୁରୁ ଦେବତା

ତାଙ୍କ ସେବା ଧର୍ମ କରିବା ଦେଇ ପ୍ରାଥମିକତା ll

ତାଙ୍କ ପରି କେହି ଦେବତା କିଏ ସରଗେ ଅଛି

ସ୍ୱଦେହେ ଆମର ସେବାକୁ ପାଖେ ରହି କରୁଛି ll

ଚଳନ୍ତି ଦେବତା ମୋହର ପୂଜେ କରି ଜଣାଣ 

ତାଙ୍କରି ସେବାରେ ମୋହର କଟୁ ସାରା ଜୀବନ ll