Library
ଆଜିର ନାରୀ
ଆଜିର ନାରୀ
ନାରୀ ଜାତି ମାତୃ ସ୍ଵରୂପିଣୀ
ଆଦିମାତା ଆଦିଶକ୍ତିର ଜୀବନ୍ତ ପ୍ରତୀକ
ତାର ଅନାବିଳ ଭଲ ପାଇବାରେ
ସଂସାରର ହୁଏ ଅଗ୍ରଗତି ପ୍ରଗତି
ସେବା ଯତ୍ନ ତ୍ଯାଗରେ ଉତ୍ସର୍ଗୀକୃତା
ସ୍ନେହ ମମତାର ଅମୃତ ଧାରା ସେ
ଦାନ କରେ ଅବିରତେ ଜଗତର ମଙ୍ଗଳ ଲାଗି
ସହିଷ୍ଣୁତାରେ ସର୍ବଂସହା ଧରିତ୍ରୀ ପରି
ସହି ଯାଏ ସନ୍ତାନର ଲାଗି ସବୁ କଷ୍ଟ ଯନ୍ତ୍ରଣା
ମାତା ସୀତା ସତୀ ସାବିତ୍ରୀ ଅନସୂୟା
ଶାସ୍ତ୍ର ପୁରାଣରେ ଦେବୀ ନମସ୍ୟା
ଆଦର୍ଶ ଜୀବନ ଗଠନ ପାଇଁ
ସମାଜକୁ ଦିଅନ୍ତି ଅନନ୍ୟ ପ୍ରେରଣା
ରାଣୀ ଲକ୍ଷ୍ମୀବାଇଙ୍କଠାରୁ ଶ୍ରୀମା
ମାଦାର ତେରେସା ପଦ୍ମଶ୍ରୀ ତୁଳସୀ ମୁଣ୍ଡା
ନାରୀ ଜାତିରେ ମହୀୟସୀ ମହିଳା
ମହନୀୟତାର ମହିମାରେ ଚିର ପୂଜ୍ୟା
ଆଜିର ନାରୀ ସେ ପଥକୁ ଅନୁସରି
ଜୀବନର ଯାତ୍ରା ପଥେ ଚାଲନ୍ତି କ୍ବଚିତ
ବହୁ ନାରୀଙ୍କ ଚରିତ୍ର ହୁଏ ମନ୍ଥରା ପ୍ରାୟେ
ମାଆ ରୂପେ ମାୟାବିନୀ ହୋଇ
କରନ୍ତି ନିଜ ନିଜର ହୀନ ସ୍ଵାର୍ଥ ପୂରଣ
ନାହିଁ ତାଙ୍କର ସେ ମନୋଭାବ ଉଦାରତା
କରିବାକୁ ସମାଜର ହିତ ସାଧନ
ତ୍ଯାଗରୁ ଭୋଗ କାମନା କରନ୍ତି ବେଶି
ପରିବାରରେ ଶାଶୁ ବୋହୂଙ୍କଠାରୁ
ସମାଜରେ କରନ୍ତି ନା ନା ଭାବେ ଉପଦ୍ରବ
ଟଙ୍କା ପାଇଁ ନିଜକୁ ବି କରନ୍ତି ବିକ୍ରି
କଳା ବଜାରୀରେ ହୋଇ ସାମିଲ
କରନ୍ତି ବିଷାକ୍ତ ନିଶାର ଚୋରା ଚାଲାଣ
ପାରିବାରିକ ଜୀବନକୁ ମଣନ୍ତି ହେୟ
ଅନେକ ସ୍ଥାନରେ ଅନେକ ସମୟରେ
ସ୍ବାମୀ ସ୍ତ୍ରୀ ମଧ୍ୟରେ ଘଟେ ଅପ୍ରୀତିକର ସ୍ଥିତି
ହୁଏ ବିବାହ ବିଚ୍ଛେଦ ଛାଡ଼ପତ୍ର ଆଦି
ବୁଝାମଣାରୁ ହଜିଯାଏ ଭରସା ବିଶ୍ବାସ
ବଢି ଚାଲେ ପ୍ରତିହିଂସା ପ୍ରତିଶୋଧ
ପୁନଶ୍ଚ ନିଜ ସୌନ୍ଦର୍ଯ୍ୟର ସୁରକ୍ଷା ଲାଗି
ଜନ୍ମିତ ସନ୍ତାନକୁ ଦିଅନ୍ତି କୃତ୍ରିମ କ୍ଷୀର
ନିଜେ ନ ନେଇ ଶିଶୁର ଉପଯୁକ୍ତ ଯତ୍ନ
ଆୟା ବା ଧାୟୀକୁ ଦିଅନ୍ତି ସେ ଦାୟିତ୍ଵ
ସ୍ବାଧୀନତାର କରନ୍ତି ଦୂରୁପଯୋଗ
ସ୍ବେଚ୍ଛାଚାରିଣୀ ହୋଇ ସମାଜେ କରନ୍ତି ଅନର୍ଥ
ଶିକ୍ଷା ସଂସ୍କୃତିର ହୁଏ ଘୋର ଅପମାନନା
ନିଜ ଦୋଷ ସ୍ଵୀକାର ନ କରି ନ ସୁଧାରି
ଅନ୍ୟକୁ କରନ୍ତି ଯୁକ୍ତିଛଳେ ଦୋଷାରୋପ
ପୁରୁଷ ପ୍ରଧାନ ସମାଜ ବି ବହୁ କ୍ଷେତ୍ରେ ଦାୟୀ
କନ୍ୟାରତ୍ନକୁ ଦିଅନ୍ତି ନାହିଁ ଅଗ୍ରାଧିକାର
ଝିଅଟିଏ ହୋଇ ହୁଏ ନିର୍ଯ୍ୟାତିତା
ଅବହେଳିତ ଭାବରେ କାଟେ ଦିନକାଳ
ଆଜିର ନାରୀ ଶିକ୍ଷା ଦୀକ୍ଷାରେ ଆଗୁଆନ
ଚାରି କୋଣର ପରିସୀମା ଭିତରୁ ବାହାରି
ସାରା ବିଶ୍ଵରେ କରୁଛି ତା' ପ୍ରତିଭା ବିକାଶ
ସ୍ଵଭାବ ଗୁଣ ଚରିତ୍ର ପାଇଁ ହୁଏ ଜଣେ ପୂଜ୍ୟା
ହୀନ ଅପକର୍ମ ପାଇଁ ହୁଏ ସେ ଘୃଣ୍ୟା
ନିଜେ ନିଜେ ସବୁ ନ ହେଲେ ସଚେତନ
ଉନ୍ନତିକରଣେରେ ନାହିଁ ସୁନ୍ଦର ଜୀବନ ।
