ଆଜି ପଣା ସଂକ୍ରାନ୍ତି

   ଢମଣା ଛାଡ଼ିଲା କାତି,

ପରବ ପ୍ରିୟ ମୋ ଓଡ଼ିଆ ଜାତି,

  ପର୍ବ ପାଳେ କେତେ ଜାତି l

   ଶ୍ରୀକ୍ଷେତ୍ରରେ ନାହିଁ ରାତି,

ରତ୍ନ ସିଂହାସନେ ଚତୁର୍ଦ୍ଧା ମୂର୍ତ୍ତି,

      ଆଜି ପଣା ସଂକ୍ରାନ୍ତି l

     ବଇଶାଖେ ବଡ଼ ଖରା,

ଆଜି ଆମ ନୂଆ ବରଷ ପରା,

    ମଙ୍ଗଳା ଝାମୁ ଯାତରା l

   ଘରେ ଘରେ ବେଲ ପଣା,

ବସନ୍ତରା ଠେକି ପଛରେ କଣା,

    ବହେ ଜଳର ଝରଣା l

     ଦାଣ୍ଡରେ ଘଣ୍ଟ ପାଟୁଆ,

ରଣପା ନାଚରେ ଶାରଳା ମାଆ,

  ଘଣ୍ଟ ବାଜେ ଢାଆଁ ଢାଆଁ l

   ଶରଶଯ୍ୟା ପରେ ଭୀଷ୍ମ,

ପାଶେ ତାଙ୍କ ଛିଡ଼ା ପାର୍ଥ ଶ୍ରୀକୃଷ୍ଣ,

    ଜଳ ପିଇବେ ସତୃଷ୍ଣ l

      ବାଣ ବିନ୍ଧି ଅରଜୁନ,

ଜଳ ପିଆଇଲେ ଗଙ୍ଗା ନନ୍ଦନ,

    ଗ

Advertisement

ଙ୍ଗା ଭୂମିରୁ ଉତ୍ଥାନ l

      ମହାନ ହିନ୍ଦୁ ସମ୍ରାଟ,

ଆସନେ ବସିଲେ ବିକ୍ରମାଦିତ୍ୟ,

   ଉଜ୍ଜୟିନୀ ନାମ ଖ୍ୟାତ l

     ଚଢ଼େଇଆ ଚଢ଼େୟାଣୀ,

ଗଞ୍ଜାମରେ ଦଣ୍ଡ ଯାତ୍ରା ହେଲାଣି,

    ପୁଣି ଯାତ୍ରା ଠାକୁରାଣୀ l

     ନାହାକ ପଢ଼ିଲେ ପାଞ୍ଜି,

ବହିଲାଣିି ମଣି ! ବିଷମ ଝାଞ୍ଜି,

     ଭରସା ମାତର କାଞ୍ଜି l

     ଜନ୍ମ ଲଭିଲେ ମାରୁତି,

ଲଙ୍କା ଜଳିଗଲା କେଡ଼େ ଝଟତି,

   ପାପେ ସିନା ଏ ଦୁର୍ଗତି l

      ବିଷୁବ ମଣ୍ଡଳେ ଗତି,

ସପ୍ତାସ୍ଵ ବାହନେ ଛାୟାଙ୍କ ପତି,

    ବିଷୁବ ଏହି ସଂକ୍ରାନ୍ତି l

     ବାଛି ବାଛି କରି ଦିନ,

ଉତ୍କଳରେ ନବବର୍ଷ ପାଳନ,

ଜୟ ଜୟ ନୀଳାଦ୍ରି ମଣ୍ଡନ l