विठू माऊली तू माझी विठू माऊली
विठू माऊली तू माझी विठू माऊली
पांडुरंगा तुझा, लागला रे लळा
भाव माझा भोळा ,तुझ्या नाना कळा
भक्तीचा कळवळा, पाणी आले डोळा
तुझ्या दर्शनाची ओढ आज लागली
विठू माऊली तू माझी विठू माऊली
राहिला तू उभा ,चंद्रभागेतीरी
वसवली पंढरी, वैकुंठ नगरी
येरझारा करी, भोळा वारकरी
तुझ्या दर्शनाची आस आज लागली
विठू माऊली तू माझी विठू माऊली
दिंड्या पताकाची, झाली गर्दी भारी
टाळ मृदुंगात, नाचे वारकरी
तुझ्या दर्शनाला, लागे मोठी बारी
तुझ्या दर्शनाची ओढ आज लागली
विठू माऊली तू माझी विठू माऊली
सावळे रूप ते ,पाहिले मी डोळा
दाटला उमाळा, भरून आला गळा
कपाळी अभिर, कंठी तुळशीमाळा
राऊळी चा कळस, न्याहाळी वेळोवेळा
तुझी भक्ती आज भरुनी कशी पावली
विठू माऊली तू माझी विठू माऊली