शीर्षक :- कसं मिळेल हो पाणी...
शीर्षक :- कसं मिळेल हो पाणी...
ये रे ये रे पावसाची विसरली गाणी
पाऊस पडेना कसं मिळेल हो पाणी
वृक्षतोड प्रदूषण जगण्याची घाई
चिमणी पाखर गेली छावणीत गाई
पाणवठा सुकलाया भेगा पडल्या रानी
पाऊस पडेना कसं मिळेल हो पाणी
पेरणीची लागलिया बळीराजा आस
अन्नदाता पोशिंदा तो भरवितो घास
काळ्या आईच्या सुताचे दुःख कोण जाणी
पाऊस पडेना कसं मिळेल हो पाणी
पाणी आडवा पाणी जिरवा संकल्पच भारी
पण शेती माती वर झाली राजकारण सारी
पाण्यासाठी भटकते जनता केविलवाणी
पाऊस पडेना कसं मिळेल हो पाणी
निसर्गही भ्रष्ट झाला करतोय चाळा
अवकाळी बरसुनी बसलाय भोळा
मनवाया धोंडी धोंडी करतात शहाणी
पाऊस पडेना कसं मिळेल हो पाणी
झाडे लावा झाडे जगवा जपा हिरवळ
आटणार नाही नद्या नाली अन् तळ
सुजलाम सुफलाम ठेवा ध्यानी मनी
पाऊस पडेल आणि मिळंल हो पाणी