सांजधार...

तू झाकलेल्या वादळांची,

सुरूवात असेन मी कदाचित..

काजळत चाललेल्या सांजेची,

सांजवात असेन मी कदाचित... १

अर्धाच राहिलेला तो तुझा,

प्रवास असेन मी कदाचित..

तुझ्या मौनाच्या बंद डबीतला,

सुवास असेन मी कदाचित... २

नियतीच्या अधीन दु:खातील,

सांत्वन असेन मी कदाचित..

भरून येणार्‍या त्या कातरवेळची,

आठवण असेन मी कदाचित... ३.

सर्वच परिघांचे कुंपण समान,

...तरी ! ...अतृप्त अस्वस्थांचा,

त्रास असेन मी कदाचित.. ४.

समांतर चालणे झाले अशक्य तरी,

त्या राहिलेल्या अपूर्णतेचा,

भास असेन मी कदाचित...

अन...उठलेल्या वादळानंतरची,

सांजधार! असेन मी कदाचित...! ५.