रुंजी
रुंजी
रुंजी घालती मनात
सखे स्वर भावपूर्ण
ऐकूनही खूप वेळा
गमे मजला अपूर्ण
कंठस्वर भाववेडा
दुःखामधे भिजलेला
कसा अचूक येतसे
चपखल बसलेला
वादनात तुझ्या असे
खास अशी विविधता
अनवट रागांचीही
सर्वसमावेशकता
समेवर गज येता
दाद देती साथीदार
मुखावरी विलसते
सरस्वती तेजोमय
भाव भावनांचे गोफ
रुंजी घालती मनात
रेशीमलडीच जणू
जपू किती श्रवणात!!
सुखदुःख भावनांना
स्वरांमधे तू गुंफुनी
सरस्वतीस वंदुनी
कलाक्षेत्री यशस्विनी
स्वर सरिता अखंड
ओसंडून खळाळते
पूर्व जन्मीचे संचित
भाग्यवतीस लाभते
भाग्यवान रसिकही
स्वर रुंजीच घालती
मेळ सुखद सर्वदा
राहो स्वर जगताती