फटाके... मुक्ती

परिक्षेची कटकट संपली

सुट्टी लागली शाळेला

आता काय मज्जाच मज्जा

धमाल होणार दिवाळीला... १

आईचं बाई पडलयं काम

हातभार लावूया थोडा

फावला मिळेल वेळ बाबांना

बनवू त्यांना आम्ही घोडा...२

लाडू करंज्या गोड गोड

कुरकुरीत चिवडा चकली

आईच्या हाताला चवच न्यारी

टाकता क्षणी तोंडात विरली..३

आई नेहमीच सांगत असते

भुकेल्यास द्यावा घासातला घास

म्हणूनच मी ही ठरवलं यंदा

ही दिवाळी करुया नक्कीच खास... ४

प्रदुषणमुक्ती आता माझ्या

भरली ध्यानी मनी पक्की 

शपथ पाळेल सृष्टीसाठी

फटाके नकोच मजला नक्की... ५

मोह मलाच माझा

हवा आता आवरायला

प्रकाशानेच उजळू मने

सर्वांनीच नको का ठरवायला... ६