मध ओठांवरचे

धुंद तुझ्या मिठीत, काही क्षण गोवलेले,

मध ओठांवरचे, नकळत चोरलेले||धृ||

प्रीत वल्लरीवर, जे फुल उमललेले, 

आठवते मजला, हृदयात जपलेले,

चंद्राने तारकेला, क्षितिजी खुलवलेले,

मध ओठांवरचे, नकळत चोरलेले||१||

स्वप्न खगांचे पंख, अथांग पसरलेले, 

आतुरल्या सांजेचे, सारंग विखुरलेले,

साकीने यौवनाचे, मद प्याले भरलेले,

मध ओठांवरचे, नकळत चोरलेले||२||

इंद्रधनु दवांचे, मोती बहु पेरलेले,

प्रेम ओल्या मातीच्या, मृद्गंधात भिजलेले,

अनिलाच्या स्पर्शाने, हळूवार झरलेले, 

मध ओठांवरचे, नकळत चोरलेले||३||