बस्ता
बस्ता
विवाह बंधनात एक मानापमानाचे नाट्य म्हणजे बस्ता
आवश्यक असणारी खरेदी परंतु खिश्याला बसतो मात्र खस्ता II
दुकानदारांची स्वागत पद्धत एक जगावेगळी
गाद्यांवर बसवून किंमती कपड्यासोबत चहा मिळेल वेळोवेळी II
बरोबरीच्या पाहुण्यांचा चंगळवाद मात्र खरा
लेकीच्या सुखासाठी स्विकारावा लागतो जावयाचा तोरा II
प्रत्येक समारंभाचा रंग माझा वेगळा
साखरपुड्याचा निळा आणि हळदीचा पिवळा II
लग्नाचा शालू हवा हिरवा भरजरी
पहिल्या पाठवणीला चालेल चंदेरी सोनेरी II
अंतर्वस्त्राची निवड रंगी बेरंगी आणि न्यारी
माहित नाही या अगोदर कधी घेतली होती का भारी II
चप्पल आणि बुटांचा साजच आगळावेगळा
कोणताही रंग चालेल परंतु नको ढवळा काळा II
आजचीर, वर-ओवाळणी आणि नणंदेचा हक्क मानाचा
वरमाईची हौस व छोट्यांची चंगळ पण वरबाप मात्र खादीचा II
बस्त्याची खरेदी म्हणजे क्षण राग-रुसव्यांचा
परंतु तरीही नात्यानात्यातील ओलावा जपण्याचा II
बस्त्यातील खरेदी ही एकमेकांवरची कुरघोडी की खरंच पसंती
पण हीच तर खरी सुरवात एकमेकांच्या आवडी-निवडींची II
विवाह-संस्कारांतील एक अविस्मरणीय क्षण म्हणजे बस्ता
दोन घराण्यांच्या नात्याला आकार देत वाढवतो प्रेमाची आस्था II