अखेरचे ते क्षण
अखेरचे ते क्षण
अखेरचे ते क्षण मी
शांत पडुन पाहत होते ||
कधी न रडणारे बाबा आज,
हुंदके देऊन स्वत:ला सावरत होते ||१||
कधी नव्हे ते शांत झालेले डोके,
आईच्या मांडीवर निपचिप पडले होते ||
मला तिला खुप काही सांगायचे होते,
पण दिवस मात्र सरले होते ||२||
एकटक आई फक्त,
माझ्याकडे पाहत होती ||
कणा नसल्यासारखी ती
गळुन पडत चालली होती ||३||
गिफ्ट देणा-या सर्वांच्या हातात
आज हार दिसत होता ||
ज्याने एका काळी गुलाब दिला होता
तो मात्र एका कोप-यामध्ये उभा होता ||४||
पुष्कळ स्वप्न मी माझ्या सोबत
घेऊन चालले होते ||
मागे मी माझ्या आठवणींचे
गाठोडे मात्र सोडले होते ||५||
काही ओळखीचे तर काही अनोळखी
चेहरे सर्व गोळा झाले होते ||
सर्वांच्या अश्रुंचे कारण मात्र
मी एकटीच बनले होते ||६||
ज्यांच्या मी पाया पडायचे
ते आता माझ्या डोके टेकु लागले ||
शरीर मेले होते आता मनही
ते पाहुन अर्धेमेले झाले होते ||७||
माझ्या हसण्याने फुलुन उठणारे घर
जाण्याने कोमजले होते ||
आता सुन्न पडलेले चेहरे,
मला पाहवत नव्हते ||८||
अखेरचे क्षण ते खरचं
अखेरचे उरले होते ||
आता शेवटचे सरण
पण रचले होते ||९||