आईच्या छायेत

आई तुझी माया। ह्या बाळ गोपाळा।

ममतेचा मळा। प्रेमदायी।।

वात्सल्याचा ठेवा। मायेचा सागर।

प्रेमाचे आगार। माय माझी।।

नाही तुझ्या सम। किर्ती फार गोड।

नसे कुणी जोड। कृपासिंधु।।

खाई शिळे अन्न । बाळा तुप रोटी ।

कष्टे तयासाठी । रात्रंदिन ।।

मुल कृश वेडे ।अंध वा पांगळे ।

आईस वेगळे ।कदा नसे।।

चित्ती कळवळा।नित्य वाही सदा |

वियोग न कदा।मातृत्वासी।।

आई तुझ्या मुळे। जन्म हा मिळाला

अर्थ जीवनाला। आला माझ्या।।

नैराश्य ते येता। शब्दांचा सहारा।।

मायेचा पहारा। पाठी असे

किती गुण गाऊ। माझ्या ग माऊली।

घराची सावली। प्रेम छत्र।।

आई तुझे पांग। फिटणार नाही।

होणे शक्य नाही। कर्जमुक्ती।।