ಋತುಗಳ ರಾಜ

ಶಿಶಿರ ಕಳೆದು ಎಲೆಗಳುದುರಿ

ಬಿಸಿಲು ಏರಿ ಭುವಿಯು ಬಳಲಿ

ಕಾಯುತಿಹಳು ಧರಣಿ ವಸಂತನ

ಭುವಿಯ ಬೇಗೆಯ ಕಳೆಸುತ್ತಾ

ಮರದ ಒಡಲು ಚಿಗುರಿಸುತ್ತಾ

ಬಂದ ಬಂದ ಋತುರಾಜ ವಸಂತ

ಮಾಮರದ ಚಿಗುರೊಡೆದು

ಮನೆಯಂಗಳದ ಮಲ್ಲಿಗೆ ಬಿರಿದು

ನಲಿದಾಡಿಸಿದವನಿಯ ವಸಂತ

ಮಾಮರನ ತೆಕ್ಕೆಯೊಳು ಕುಳಿತು

ಕುಹೂ ಕುಹೂ ಕುಹೂ ಪಂಚಮದಿ

ಉಲಿಯಿಸಿದ ಕೋಗಿಲೆಯ ವಸಂತ

ಬೇವಿನ ತಂಪ ನೀಡುತ್ತಾ

ಬೇಸಿಗೆಯ ಬಿಸಿಲ ಕಳೆಸುತ್ತಾ

ನೀಡಿದ ಇಳೆಗೆ ತಂಪನು ವಸಂತ

ಮನೆಯಂಗಳದ ಮಲ್ಲಿಗೆ ಅರಳಿಸಿ

ಮಾನಿನಿಯರ ಮುಡಿಯ ಸೇರಿಸಿ

ನಕ್ಕು ನಲಿದಾಡಿಸಿದ ವಸಂತ

ಎಲೆಗಳುದುರಿದ ಬೋಳು ಮರದಿ

ನವಪಲ್ಲವಗಳ ಮತ್ತೆ ಚಿಗುರಿಸುತ

ಮತ್ತೆ ಬಂದ ಋತುರಾಜ ವಸಂತ

ಬರಡಾದ ಭೂಮಿಯನು ಸಂತೈಸಿ

ಮತ್ತೆ ಹೊಸ ಬೀಜಗಳ ನೀಡುತ

ಹಸಿರಾಗಿಸಿದ ಇಳೆಯ ವಸಂತ

ಮಾವು ಬೇವು ತೆಂಗು ಕಂಗು

ಮರಲೆ ಮಲ್ಲೆ ಮಲ್ಲಿಗೆಗಳು

ನಲಿದಾಡಿದವು ವಸಂತನಾಗಮನಕೆ