Library
Profile
વિધવા ભાગ-50 પિયુજીને કહેજો
વિધવા ભાગ-50 પિયુજીને કહેજો
(રાગ-કા'નુડાને કે'જો એકવાર ગોકુળિયામાં...)
પિયુજીને કહેજો હવે વિદેશમાંથી આવે,
વિદેશમાંથી આવે અને દેશપ્રેમ જગાવે;
પિયુજીને કહેજો હવે વિદેશમાંથી આવે !
પ્રેમના રે તરસ્યાં અમે, ગળે શોષ પડતા,
વિદેશમાંથી આવી અહીં પ્રેમ તો વરસાવે;
પિયુજીને કહેજો હવે વિદેશમાંથી આવે !
ભાવના રે ભૂખિયાં અમે ખૂબ ખૂબ દુઃખિયા,
વિદેશને છોડીને અહીં પ્રેમગંગ વહાવે;
પિયુજીને કહેજો હવે વિદેશમાંથી આવે !
નાનાં અમથી ઘરનો ભાર કેમ સહેવાય?
વિદેશમાંથી આવે ને બોજો હલકો કરાવે;
પિયુજીને કહેજો હવે વિદેશમાંથી આવે !
નાનેરો બાળ નિરંતર ‘પિતા, પિતા' ઝંખતો,
વિદેશમાંથી આવે અને બેટા કહી બોલાવે;
પિયુજીને કહેજો હવે વિદેશમાંથી આવે !
સુધબુધ રહે નૈ અમે ભાન ભૂલી જઈએ,
પિયુજી આવીને હવે અમને ભાનમાં લાવે;
પિયુજીને કહેજો હવે વિદેશમાંથી આવે !
ધનના રે મોહમાં આપણો દેશ તમે છોડયો,
વિદેશનું કામણ હવે ખૂબ દૂર ભગાવે;
પિયુજીને કહેજો હવે વિદેશમાંથી આવે !
આપનારો અહીં પણ હજાર હાથવાળો છે,
ટુકડો આપે પણ એ ભૂખ્યા ન સુવડાવે;
પિયુજીને કહેજો હવે વિદેશમાંથી આવે !
તમારા વિના તો અહીં છે ફૂલ કરમાયેલાં,
તમે આવો તો હવે ઋતુરાજ વસંત આવે;
પિયુજીને કહેજો હવે વિદેશમાંથી આવે !
તમારી યાદમાં અમારે બારેમાસ ચોમાસું,
નથી ઘરધણી હાજર પછી કોણ મનાવે;
પિયુજીને કહેજો હવે વિદેશમાંથી આવે !
સમયચક્ર ફરે દિવસ વીતતા જાય છે,
લાંબો લાંબો વિરહ હવે કેટલોક સહાવે;
પિયુજીને કહેજો હવે વિદેશમાંથી આવે !
