સરદારનું ગીત - રર
સરદારનું ગીત - રર
કોંગ્રેસ (ઈ,સ, ૧૯ર૧)
અમદાવાદ આ સાલ, કોંગ્રેસ છે ભરાય રે;
એમાં વલ્લભભાઈને, સ્વાગતમાં રખાય રે,
ખામીઓને સુધારીને, રાખતા ન કચાશ રે;
સતત કામમાં લાગે, લેતા ન નવરાશ રે,
ખાવા-પીવા રહેવાની, સગવડો તમામ રે;
સાદાઈ પણ રાખીને, દીપી ઊઠેલ કામ રે,
શૌચ-મૂતરડી માટે, પૂરું ધ્યાન અપાય રે;
રાખી ત્યાં કચરાપેટી, સ્વચ્છતા જળવાય રે,
ખાદીની ઝૂંપડીઓથી, ખાદીનગર થાય રે;
ફૂલો ને પાંદડાંઓથી, મંડપને સજાય રે,
સંગીત જલસા સાથે, પ્રદર્શન રખાય રે;
જેથી આવી અહીં લોકો, કરી આનંદ જાય રે,
ફેલાવે અફવા કોઈ, ને લોકો ગભરાય રે;
રજૂ કરી ખુલાસાઓ, ડર દૂર કરાય રે,
વાહનોની વ્યવસ્થામાં, સેવકોને રખાય રે;
વિનય રાખવા માટે, ચુસ્ત સૂચન થાય રે,
આ બાજુ જે શહેરોમાં, જાય છે યુવરાજ રે;
બહિષ્કાર કરે તેનો, ત્યાંનો પૂરો સમાજ રે,
અમદાવાદમાં આવ્યા, ઘણા મહાનુભાવ રે;
મળ્યા છે સહુને ત્યારે, ખૂબ આદરભાવ રે,
કર્યું વલ્લભભાઈએ, પ્રવચન સચોટ રે;
કર્યું ન સરકારે કૈં, એની રહેલ ખોટ રે,
જડતી-હુમલા-કેદ, એ પ્રસંગો બનેલ રે;
માની સ્વરાજનાં ચિહ્નો, એ સ્વીકાર કરેલ રે,
સરકારે દઈ દીધો, શક્તિને પડકાર રે;
આપણે સહુએ દીધો, તકને આવકાર રે,
કરવો કાયદાનો છે, સવિનય જ ભંગ રે;
એ માટે રાખવાનો છે, સૌએ હૈયે ઉમંગ રે,
**
સરકાર મનાવાની, ચમત્કાર વિના નથી;
જો વલ્લભ બને પાર્થ, બને મોહન સારથી.
(ક્રમશ:)