સાંપડે સિદ્ધિ સદા

પુરુષાર્થ કરતાં ચાલશો તો સાંપડે સિદ્ધિ સદા,

નૈરાશ્ય નાથી, દોડશો તો સાંપડે સિદ્ધિ સદા,

ફોગટ નથી જાતા અહીં કાર્યો કરેલા જાણજો,

મળશે સફળતા માનશો તો સાંપડે સિદ્ધિ સદા,

છે જિંદગી કષ્ટો ભરેલી, હારવું મારે નથી, 

પડકાર પામી, ખાંપશો તો સાંપડે સિદ્ધિ સદા,

સંજોગ કેરી નાવડી, તરફેણમાં આજે નથી,

પ્રસ્વેદ બિંદુ પાડશો તો પામશો સિદ્ધિ સદા,

ઉડાન ઊંચી રાખવી ના લક્ષ્ય નીચું હો કદી,

વિશ્વાસ દિલમાં રાખશો તો સાંપડે સિદ્ધિ સદા,

મુશ્કેલ ક્ષણને માણવી, મક્કમ મને પણ કાયમી,

ધીરજ ધરી ને મ્હાલશો તો સાંપડે સિદ્ધિ સદા,

હુન્નર તણી તું ખાણ છે ! પામી શકે ધાર્યું સકલ,

આશા કણી પ્રગટાવશો તો સાંપડે સિદ્ધિ સદા.