રજકણ

તુજ રંગે રંગાઈ જવું છે,

દીન દુનિયા વિસરાઈ જવું છે,

ઘૂઘવે અંતર ઊર્મિ મારી

તુજ હૈયે પડઘાઈ જવું છે,

યાદ બની ઉભરાઈ જવું છે,

આંખેથી છલકાઈ જવું છે,

કેસૂડાએ કામણ કરીયાં,

રંગ રાતે અંજાઈ જવું છે,

સાંચ તુલા તોળાઈ જવું છે,

પ્રેમ શબદ બોલાઈ જવું છે,

હોંઠ ખુલે ને ખિલે મોગરો,

સ્મિત બની વેરાઈ જવું છે,

વસંત થઈ મ્હેંકાઈ જવું છે,

શ્વાસો માંહે સમાઈ જવું છે,

ધક ધક સાથે તાલ મિલાવી,

પાલવ થૈ વીંટળાઈ જવું છે,

પલકારે ઝડપાઈ જવું છે,

નયન બાણ વીંધાઈ જવું છે,

નાચે હૈયું ઝાંઝર પહેરી,

ધબકારે ઝણકાઈ જવું છે,

વિશ્વાસે "ઋજુ" ચણાઈ જવું છે,

પાયામાં ધરબાઈ જવું છે,

સપ્તરંગી સંબંધ સરનામે,

રજકણ થઈ પથરાઈ જવું છે.