પરમ પ્રેમની રીત

દરેક નદીઓ કંઈ સમંદરને મળતી નથી,

જેને ચાહો એને એ વ્યક્તિ મળતી નથી !

તમન્નાઓ શિખર હિમાલયનું બની ગઈ,

સૂરજની હૂંફ વગર હવે ઓગળતી નથી !

રણમાં છે કોશિશો સઘળી હરિયાળીની,

ને બુંદો ઝાકળની ક્ષણ ભર ટકતી નથી !

સંદેશાઓ હવાઓમાં તરી રહ્યાછે હજી,

ભાષા ઉકેલની કોઈ ક્યાંય જડતી નથી !

એક એક દ્વાર ખખડાવી થાક્યો ગૃહે ગૃહે,

એના નામની ક્યાંય પણ કોઈ તક્તી નથી !

"પરમ" પ્રીતની રીત રહી સદા અજબ ગઝબ,

"પાગલ" થયા વગર એ કદી સમજાતી નથી !