પ્રેમ આમ જ થાય છે
પ્રેમ આમ જ થાય છે
આ છુટ્ટા વાળ રાખવાનું જરા રહેવા દો,
આ મન વેણી વેણી થઈ જાય છે,
તમારી ઝુલ્ફોને લહેરાવવી રહેવા દો,
અહીં પવન સરીખા થઈ પડાય છે,
રશ્મિ આવતું વીંધી ઝાકળ ને ભલે,
અણીયાળી આંખોથી ઉર વીંધાઈ જાય છે,
એ પાંપણને ઝૂકાવાવી જરા રહેવા દો,
આ જીવ પાણી પાણી થઈ જાય છે,
અમથાં ના મલકો, કંઈક કારણ તો રાખો ?
સામુ જોઈને પછી મળવાનું ય રાખો !
ગુલાબી શમણાં સજાવતા રહીને અહીં,
ઓલી મોંઘી નીંદર વેરણ થઈ જાય છે,
ત્રાંસી નજરો ના થયાં છે ત્રાટક ઘણાં,
હવે તો અમસ્તું ય ઓળખી જવાય છે,
વળી, સપનામાં તો તમે રોજ આવો જ છો,
પણ, રૂબરૂ મળો તો ભૂલા પડાય છે,
ક્યાંથી ક્યાં જવું આ પ્રણય કેડીએ,
હવે, જ્યાં જઈએ ત્યાં 'એ' વરતાય છે,
જરા એંધાણીઓ રાખો એ રસ્તાની,
સુગંધ કેરા દરિયે અહીં રોજ ભટકી જવાય છે,
આજે તો તમે કરી નાંખી હદ બેહદ,
એ સ્પર્શ જાણીને અજાણે કરેલ જણાય છે,
હજુ સાચવીને બેઠો છું આ હથેળીને,
આવું મળેલું સુખ એમ થોડું વેડફી દેવાય છે ?
ધૂમ્રસેરો ઘણી ઊઠે છે આજકાલ 'આપણી',
હવે તો કરો ચોખવટ, જરૂર જણાય છે,
'શૈલ' એવું પણ ખરું કે ભ્રમ કદાચ હોય આ,
બાકી મજા છે માનીને કે પ્રેમ આમ જ થાય છે.