પક્ષીની વ્યથા

પીંજરામાં ઝૂલતા પંખીએ ટહુકામાં

સરનામું આજ આસોપાલવનું પૂછ્યું ! 

પંખીના કલરવે તરફડે ચીસોનો ઝુરાપો

તીણી વેદનાને કોણ જઈ માપે !

ઊડશે જો પાંખે તો ભીતરનો ખાલીપો

ઘણી ડાળીઓને ચૂમીને કૈં આપે !

સૂરજનું કિરણ પેલી ધરતીને રંગતું 

અંધારા ઓરડે એ કેમ પામે !

બારીની તડમાંથી રોજ મૌન નિરખતું

અચરજથી એ ચાંદાની સામે !

સોનેરી પીંજરમાં કેવા રૂપેરી છે હીંચકા

એની પાંખો કરવતથી કંઈ કાપે !

ગુલમહોરની ડાળે છે બુલબુલના ટહુકા

એને લાવીને કોણ ફરી આપે ! 

ઊડવાની ઈચ્છાઓ સળવળતી ઝાઝેરી

પાંખો ફફડતી આજ એક સૂરે !

આંખોની આરપાર ઝંખના ઝૂલે રૂપેરી

કીકીઓમાં રોજ આવી ઝૂરે ! 

 મુક્ત ગગને એને વિહરવા સૌ સંગમાં

એને બંધનમાં ના કદી બાંધો ! 

વાદળોને ઝૂલે એને ઝૂલવા કંઈ રંગમાં

એ વ્યથાના ટહુકાઓ છે જાગો !

પીંજરામાં ઝૂલતા પંખીને ટહુકામાં

આખા આકાશનું સરનામું આપો..!