મુજ દિલને ગવારા નથી

ચાલુ હું સદા મુજ બનાવેલ રાહ પર,

બીજાની રાહે ચાલુ હું !

એ મુજ દિલને ગવારા નથી.

જિંદગી ગુજારીશ મુજ નીતિ નિયમોથી,

બીજાનાં નિયમો પાળુ હું !

એ મુજ દિલને ગવારા નથી.

બદલ્યો છે સ્વભાવ તેવર તો આજે પણ એ જ,

બીજાનાં તેવરને ગાંઠુ હું !

એ મુજ દિલને ગવારા નથી.

ભલે બેરંગી શુષ્ક-વેરાન જીવન હોય મારું,

બીજાનાં રંગે રંગાવું હું !

એ મુજ દિલને ગવારા નથી.

હિંમતનો રોટલો ચાલશે પોલાશનાં પકવાન નહીં,

બીજાનાં પગ પંપાળું હું !

એ મુજ દિલને ગવારા નથી.

વેંત નમો તો હાથ નમું અકકડની તો ઐસી તૈસી,

બીજાની અકકડને સાખું હું !

એ મુજ દિલને ગવારા નથી.

જીવી જઈશ જિંદગી મારી ખાલીખમ ખિસ્સે,

બીજાની ભીખ ઝંખું હું !

એ મુજ દિલને ગવારા નથી.

નિ:સ્વાર્થ પ્રેમ સરિતા વહાવતો જઈશ મુજ માર્ગ પર,

બીજાની મોજ માણું હું !

એ મુજ દિલને ગવારા નથી.

ઘોર અંધકારમય જીવન ભલે ને હોય આ 'નાના'નું,

બીજાનાં ચિરાગ જલાવું હું !

એ મુજ દિલને ગવારા નથી.